GO! 2025, une capitâl europeane de culture cence il furlan e cun masse pocje Europe

Chê che le clamin GO! 2025, magari cussì no, e je une capitâl europeane de culture che i mancje alc di impuartant: e je cence furlan e duncje e je cun masse pocje Europe. Cun di fat, tacant de sô scree, ai 8 di Fevrâr stâts, il percors di Nova Gorica e Gurize par chest an al mostre une muse une vore diferente di chê che si spietavisi, pensant ae maniere che lis autoritâts de Slovenie a vevin fat indenant la candidature di Nova Gorica cun Gurize par chel titul pal an 2025.
◆ Se la idee di partence e jere gjeniâl – meti dongje dôs citâts che par passe cincuante agns a jerin stadis dividudis di un confin “penç” e “pesant” e teritoris che a son di simpri multilengâi e multiculturâi e par chel “cence confins”, cundut dai conflits e des bariduris fisichis e ideologjichis che ju àn segnâts vie pal Nûfcent – il so disvilup al somee clopadiç o almancul minimalist e une vore lontan di chê vision di Europe, pardabon coerente cul sproc «unide inte diversitât», che di chel al varès di saltâ fûr. Par cumò si à vût fevelât e scrit, scoltât e let, dome di «confin», di «Slovenie» e di «Italie», soredut di ca dal clap. La «Europe», se e je, in chest contest e fâs dome di fonts, tant che suaze di une cooperazion intergovernative e transfrontaliere, là che a contin dome i Stâts cui lôr nazionalisims dominants.
◆ Chest aspiet si à palesât ad in plen juste intant de cerimonie di scree e inte plui part dai discors dai sorestants inte place de Transalpine, massime di chei che a àn fevelât in rapresentance des istituzions di ca dal clap. I lôr intervents a son stâts pal plui une vore gjenerics, lassant in bande la nature plurâl e miscliçade di chestis tieris e de lôr int, che il lôr ricognossiment e il lôr rispiet a son in chel istès la fonde e la pratiche di dirits, di citadinance, di convivence… e duncje – par dîle cuntune peraule impuartante e impegnative – di Europe.
Chê stesse ande si le cjate ancje inte plui part dai events culturâi che a son tal program di GO! 2025, par no fevelâ de comunicazion istituzionâl de “capitâl europeane”. In cheste suaze, chel che si podarès clamâlu il so «deficit» di Europe o di «europeicitât» si lu viôt in particolâr inte mancjance, tra lis lenghis uficiâls de iniziative, dongje dal sloven, dal talian e dal inglês, de lenghe furlane e salacor ancje dal todesc, stant che ancje chês a son lenghis dal teritori e lenghis de Europe…
◆ Cundut che almancul dal 2022 plui di cualchidun e in plui di cualchi ocasion – visantsi ancje dal bon esempli di capitâls europeanis de culture tant che Umeå tal 2014 (citât sami de Svezie), Donostia/San Sebastian tal 2018 (Paîs Basc, Ream di Spagne), Ljouwert/Leeuwarden tal 2019 (Frisie, Ream dai Paîs Bas) e Gaillimh/Galway, in Irlande, tal 2020 – al ves fat indenant une propueste operative di cheste fate, nol è stât fat nuie in cheste direzion de bande di cui che al veve il podê e la fuarce par fâlu. Cundut dal articul 6 de Costituzion de Republiche Taliane e dal articul 3 dal Statût de Regjon che e ten dongje la plui part dal Friûl e la zone di Triest, che ae fonde de sô autonomie speciâl a son propit lis lenghis des minorancis e la lôr tutele, in cont de cuistion a son stâts cidins e fers in diviers di lôr: dal organisim regjonâl di politiche linguistiche pal furlan ae Assemblee de Comunitât Linguistiche Furlane, dal Comun di Gurize aes istituzions de Regjon (Zonte e Consei). Par jessi precîs cualchidun al à ancje dit alc – la assessore regjonâl Barbara Zilli in ocasion de celebrazion de Fieste de Patrie a Tarcint ai 7 di Avrîl e veve fat une declarazion altitonante e impegnative, confermade almancul intune altre ocasion intant di une interviste su Onde Furlane – ma il risultât al reste chel: GO! 2025 impen di jessi «borderless» e je dome cence furlan e salacor cun pocje Europe.
Si rivarial ancjemò a dreçâ cheste situazion? O vino di calcolâ chest fat tant che une manifestazion di chel deficit di Europe che si viôt simpri plui e in dute Europe? ❚