Sfuei Mensîl Furlan Indipendent
Archivi de Patrie

LA INTERVISTE – Fabio Pizzul: Un furlan il prin… a Milan

............

Fabio Pizzul (foto www.fabiopizzul.com)
Fabio Pizzul (foto www.fabiopizzul.com). «Par scherç, o dîs che o soi stât "depuartât" a Milan a cuatri agns»

Se o intitulìn il toc «un furlan prin tal PD a Milan» ise une robe che e à mani? Intant o sin daûr a fâ la interviste par furlan…
Jo o soi nassût a Cormons e o soi braurôs des mes origjins. Par scherç, dispès o dîs che – di furlan – a cuatri agns o soi stât “depuartât” a Milan. In campagne eletorâl mi àn domandât di chest, se mi sint furlan, lombart o ce, e jo o rispuindevi che mi sint mitteleuropean, di chê culture multiculturâl e europeane che o ai respirât fintremai di piçul. Cumò o rivi a lâ in Friûl un pâr di voltis ad an, e vie pe infanzie o passavi tant timp là vie cui miei cusins. Cun lôr o feveli simpri par furlan e a pene che o pues lu feveli, ancje se cui miei gjenitôrs si fevele par talian. Dut câs, o soi ancje braurôs di jessi cressût chenti, te culture catoliche ambrosiane che – fra l’altri, come che si sa – e à il sô rît autonom. La bielece des difarencis e je l’aiar che o ai simpri respirât, duncje.
Citadin milanês, ma cun tancj rapuarts cuntune realtât plui di campagne come Cormons. Cualis lis difarencis e lis carateristichis des dôs situazions?
Cumò o soi a stâ a Carugate (tal hinterland di Milan, ndr) e cuant che e ven a cjatâmi mê mari e dîs «achì si viôt che e je rivade la Vierte, no come a Milan». La robe che mi ven iniment a proposit de citât al è l’oblic di stâ in cjase: si sta plui sierâts fra i mûrs, ancje se dopo la metropoli  ti da in cambi tantis oportunitâts. A Cormons o cjati plui rilassatece, sedi par vie dai timps che pai spazis plui larcs. Mi ven di ridi cuant che o soi a Cormons e i miei parincj si lamentin di cualchi file tal trafic, che a son nuie rispiet a Milan, clâr.
«Se si fâs un capanon si à di rindisi cont che o vin consumât un teritori che dopo nol sarà plui cussì»
«Se si fâs un capanon si à di rindisi cont che o vin consumât un teritori che dopo nol sarà plui cussì»

Simpri a proposit dal rapuart tra metropoli e provincie, isal vignût fûr alc a proposit de gjestion dal teritori in campagne eletorâl?
E sta cjapant pît la vision de «Green economy» par un «consum dal teritori» plui cussient. Se si fâs un capanon si à di rindisi cont che o vin consumât un teritori che dopo nol sarà plui cussì. In citât, che e à plui servizis, cirî di aumentâ la cualitât de vite, e in campagne distribuî miôr i servizis.
E su la gjestion de sanitât tal teritori, di ce  si isal discutût? Al è un teme cjalt ancje pal Friûl: ise vignude fûr cualchi formule gnove?
Fin cumò la Lombardie e à pontât sul comedâ il belanç e la promozion des ecelencis. I ospedâi di ecelence a àn di jessi pôcs e acentrâts. Il pas sucessîf al à di jessi chel di une sanitât plui sociâl, cu la idee di «ospedâl in rêt»: si à di mantignî i presidis sul teritori. La idee e je di tancj presidis che a fasin riferiment al ospedâl di ecelence, li che si cure il câs plui grâf, e chei piçui cul pront socors o une, dôs specializazions parom. Chescj ca a àn di risolvi i câs de lôr specializazion o chei plui comuns, mandant i plui grâfs tal ospedâl grant di riferiment. Il probleme al è la comunicazion e la gjestion di une rêt cussì. Une formule sigure, dut câs, no je ancjemò saltade fûr.
«Il catolicisim ambrosian, fin dai timps di Sant Ambrôs, al à cjalât ai contribûts esternis cence preclusions, pragmatic e simpri viert al futûr e al progrès»
«Il catolicisim ambrosian, fin dai timps di Sant Ambrôs, al à cjalât ai contribûts esternis cence preclusions, pragmatic e simpri viert al futûr e al progrès»

Lui al jere dirigjent de Azion Catoliche nazionâl, il president Formigoni al è di Comunion e Liberazion, il tierç contindint pe Regjon Savino Pezzotta de Cisl. La Lombardie no je cussì laiche e ciniche come che  si le descrîf, alore.
Cheste e je une vision superficiâl. La Lombardie, e massime Milan, e je viodude dome tant che capitâl de industrie, de mode, de comunicazion. Sot di cheste croste a esistin  valôrs che a àn  fat in mût di creâ chestis ecelencis, e la culture catoliche e à vude une gruesse part. Il catolicisim ambrosian, fin dai timps di Sant Ambrôs, al à cjalât ai contribûts esternis cence preclusions, pragmatic e simpri viert al futûr e al progrès. Une culture di base che e resist ancjemò in dì di vuê.
Te AC nazionâl, cemût si viodial il Friûl? Une tiere di predis «ribei» come chei di Glesie Furlane? Ce pensial de cuestion dal messâl par furlan, ancjemò fer a Rome?
Jo, fin cuant che e je durade, o lavi di piçul cu lis mês agnis ae messe par furlan te glesie de Subide, aes vot di buinore. Cuant che il gno cusin gjesuit al è stât ordenât, al à domandât di fâ la prime messe par furlan. Nô in Lombardie o vin il lezionari ambrosian che o soi braurôs, par fâ un esempli in cjamp liturgjic. La opinion corinte in Azion Catoliche, o pensi di podê dî che e je che chestis celebrazions a son positivis parcè che a rindin la comunion plui sostanziâl. Si cjale aes diferencis tant che a ricjecis, duncje no esist une vision sierade rispiet ancje aes lenghis di minorance. De cuistion dal messâl par furlan o sai, ma a jessi sincîr no sai lis motivazions che a impedissin di fâlu bon. Nol è che lis vôs a rivin fin in AC: si varès di domandâi aes Congregazions Vaticanis.
E de cuestion furlane dal pont di viste dal PD ce disial? Il PD furlan al samee evitâle, no disint nuie. La propueste de traduzion dal non tes lenghis regjonâls e je colade tal nuie: lui saressial dacuardi?
Par me no saressin problemis, anzit, ma bisugne viodi se une propueste – ancje juste – e sedi juste par un ciert moment. Se e puarte a divisions, massime in chest periodi, al è miôr posticipâle. O sin intun moment di costituzion democratiche dal PD, li che plui animis a stan dialogant e la pluralitât e je un percors lunc e delicât.
Ma no ise une cierte schizofrenie di bande di une aree culturâl che e fâs la Leç 482, ma dopo no le met in vore?
La enunciazion dai dirits, ma dopo il fâju bogns rapuartantsi cul teritori, al è un probleme par ducj. Dificil saltâ fûr di un ciert centralisim sort, che al è ancje chel dal politic che une volte elet nol rive plui a metisi in contant cu la int.
«Cul digjitâl ogni television e varà a disposizion sîs canâi par ognidun che e veve. La sfide e je cemût jemplâju e cjatâ lis risorsis economichis par fâlu»
«Cul digjitâl ogni television e varà a disposizion sîs canâi par ognidun che e veve. La sfide e je cemût jemplâju e cjatâ lis risorsis economichis par fâlu»

Fevelìn di media, stant che lui al è diretôr di Radio Marconi… In Lombardie, ma ancje in Friûl, si passarà in curt ae television digjitâl. Un cambiament epocâl: cemût si davuelzial e cualis prospetivis sono?
Dal pont di viste tecnic, cul digjitâl ogni television che je za concessionarie e varà a disposizion sîs canâi par ognidun che e veve. Chest parcè che la compression digjitâl e permet di vê un numar cussì cence interferencis tal stes spazi di emission di prime. La sfide e je cemût jemplâju cui contignûts, duncje lis ideis, e lis risorsis economichis par fâlu: za cumò in Lombardie lis televisions privadis no se passin ben par vie de crisi. Tancj canâi a puedin puartâ a une polverizazion de ufierte: cemût si movaraie la racuelte publicitarie?
Sigûr però si vierzaran tantis prospetivis. Tant par dî: Telefriuli e podarès dâ un canâl a Telenova de Lombardie che cussì e sarès presinte li, e Telenova i podarès dâ un canâl a Telefriuli che e pues fâ viodi TF ai furlans de Lombardie.
Un dai problemis cu la presince di tancj canâi al è chel de di visibilitât: za cumò e je une lote par rivâ a jessi un dai prins nûf canâi tal telecomant, figurìnsi dopo. Cul digjitâl, in automatic il gno prin canâl al pues jessi sul 14, ma il secont al è za il 63, e cussì vie simpri plui indaûr. Sigûr che dopo l’utent sal sisteme dulà che al vûl sul telecomant, ma cemût fâ par fâi cognossi un canâl? E calcolìn che ancje lis grandis emitentis a varan tancj canâi in plui, cun plui potenzialitât par fâju cognossi. Dal 2012 al rivarà ancje Sky in «clâr». Dut un fisc, in sumis…
Magari, par fâsi viodi rispiet aes televisions plui gruessis a nivel talian,  al podarès funzionâ produsi contignûts une vore locâi, dal teritori…
Sigûr, a vê lis risorsis par fâlu, e podarès jessi une idee. Chi in Lombardie la Leghe e dîs simpri di fâ un canâl in dialet, ma no àn mai rivât a fâlu. E se no si rive, al vûl dî che no son i numars, secont me. Cun di plui che in Lombardie un varesot al fâs fature a capî un bergamasc, nol è come in Friûl che jo di Cormons o capìs un cjargnel parcè che o vignìn di une stesse çocje.
La radio cemût? Tal ultin rapuart su la comunicazion dal Censis, al risulte un câl de scolte di bande dai zovins…
La radio e resist e no mi somee in dificoltât. Tignìn cont che al è un media une vore «multiplateforme»: al è vie radio, ma si lu pues scoltâ ancje in internet (i coscj pe bande si stan sbassant), o impiant la television suntun canâl digjitâl, o discjamant un podcast («file» che al conten une trasmission, ndr). I zovins le scoltin di mancul, però a discjamin i podcast fasint une sorte di palinsest personâl, ma simpri daûr di un prodot che al ven de radio. In sumis, i numars a àn di jessi ancje interpretâts.
O noti assence di confront e duncje dialic. E chest al è preocupant: no tu rivis plui a vêlu, e cul lâ dal timp no tu rivarâs a jessi plui bon di vêlu.
«O noti assence di confront e duncje dialic. E chest al è preocupant: no tu rivis plui a vêlu, e cul lâ dal timp no tu rivarâs a jessi plui bon di vêlu»

E internet? Lui al à ancje un blog (www.fabiopizzul.com).
Il blog lu ai vierzût pe campagne eletorâl, ma lu tignarai viert. Come operadôr de comunicazion mi à plasût une vore: une scuvierte. Intant, il scrivi il «post» al è un esercizi util, une produzion e une sintetizazion di ideis che o cjati impuartantone. Po dopo, il mieç al permet di comunicâ in direte ce che tu stâs fasint, e ancje il scambi cui letôrs al è impuartant, massime par un politic che dispès al patìs un ciert distac de int. Al covente ancje savê i parês di cui che no le pense come te. Cumò, cu la estremizazion de politiche in doi schiriaments si è creade une autoreferenzialitât simpri plui estreme.
O noti une assence di ocasions di vêr confront fra cui che le pense in maniere divierse: assence di confront e duncje dialic. E chest al è preocupant: no tu rivis plui a vêlu, e cul lâ dal timp no tu rivarâs a jessi plui bon di vêlu.
Tornant ae comunicazion in rêt: e dal pont di viste economic?
Par internet, in gjenerâl la sfide mi pâr chê dai micropaiaments. A son studis che a dimostrin che di front a ducj i articui di un gjornâl un a ‘nt lei dome une part. Se jo in internet, o cuntun letôr dal gjenar iPad o Kindle, o ai di front un struc dai articui e o pues comprâ impen di un gjornâl a 1,2 euros nome il toc che mi interesse a – metìn – 5 centesims, cheste e pues jessi une strade.
A proposit di gjornâi, ce pensial de situazion de cjarte stampade?
Il probleme al è che la int no lei plui. Dîs agns fa, cuant che o lavi in metropolitane, ducj a vevin un gjornâl in man, cumò chei a son une vore pôcs, e massime cuntun «free press» (gjornâl gratuit che si ten sù dome cu la publicitât) in man. Se chei a fossin une introduzion a un ûs dal cuotidian normâl e sarès une buine robe, ma no mi samee tant cussì. No crôt che si fasarà di mancul de cjarte, però bisugne ameti che e je chê plui in dificoltât. A son di tornâ a pensâ i contignûts e une integrazion fra i varis media. No si pues riproponi i contignûts de cjarte tâl e cuâl su internet e vicevierse. Al è come chei che a pensavin di riproponi la radio pe television o la television pe radio: ogni media al à lis sôs carateristichis di disfrutâ. Di front de sfide de rêt, la cjarte e à di fâlu miôr.
Dree Venier

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +