Presentât il gnûf Bant Welfare, 600 mil euros a pro di progjets pes comunitâts

“Di vot agns o din jutori a progjets inovatîfs par creâ un ecosisteme sociâl che al sepi rispuindi a dutis lis fragjilitâts simpri plui complicadis che il mont di vuê al puarte cun se. O sin convints che par fâ sù un Friûl dulà che nissun al ven lassât in bande, bisugne creâ une rêt fra istituzions, privâts e volontaris: e lis nestris azions a van in cheste direzion”. Cun chestis peraulis il president de Fondazion Friûl Giuseppe Morandini al à presentât il gnûf Bant Welfare che ancje chest an al met a disposizion des realtâts che a lavorin par iniziativis sociâls e di assistence la biele cifre di 600 mil euros. L’obietîf al è jessi bogns di frontâ in maniere inovative i fenomens come l’invecjament e la evoluzion dai modei familiârs tradizionâi che a puartin la popolazion dai vielis a jessi simpri plui debile. A coventin di fat simpri plui rispuestis personalizadis su plui nivei. A chestis finalitâts a son destinâts i fonts che la Fondazion, cul jutori di Intesa Sanpaolo, e stanziarà e che a paiaran progjets che a durin fin a un an. Pes domandis al è timp fin ai 26 di Fevrâr.
◆ La presentazion dal bant e je stade la ocasion par esaminâ ancje la cuarte anade de ricercje “La cualitât dal cambiament” davuelte dal Istitût Jacques Maritain, che e tocje la valutazion dal impat che la Fondazion Friûl e à vût midiant dai siei finanziaments sul Welfare. Chest an a son stâts valutâts 28 progjets finanziâts tal 2023. Ducj i progjets a àn dât beneficis aes fameis di sogjets fragjii: personis cun divierse abilitât, “caregivers”, anzians, zovins e fruts e a son rivâts a plui o mancul 5.800 beneficiaris cul lavôr di 300 volontaris. A spiegâlu al è stât il diretôr dal Istitût Luca Bianchi: “chescj progjets – al à dit – a van a dâ responsabilitât ducj chei che a vegnin interessâts des ativitâts”.
◆ A son di fat intervents che “a smicjin ae inclusion sociâl. Plui dal 50% dai progjets a àn a ce fâ cun ativitâts formativis pes fassis plui vulnerabilis, rivant a fâ cressi lis competencis dai beneficiaris pal 72% e dai volontaris pal 70%. Il 60% des iniziativis consideradis al à gjenerât une incressite dai finanziaments midiant di altris risorsis tiradis sù cun operazions di crowdfunding e fundraising”.
◆ A puartâ une testemoneance ‘sul cjamp’ e je stade la imprese sociâl LiLuna di Cjasarse, cu la vôs de coordenadore dai servizis Alessia Amodeo e l’intervent di Elena Di Chiara, che e vîf inte Comunitât Cjasaluna, nassude cul progjet “Coltivare l’autonomia” che al è stât poiât de Fondazion Friûl fin de prime edizion dal bant. Achì si è metude in pîts une ‘filiere domestiche’ a partî dal ort e dal gjalinâr, rivant a trasformâ e a confezionâ conservis e marmeladis che a coventin par jemplâ lis taulis des personis debilis che a stan chenti e des lôr fameis.
◆ La Regjon e viôt di bon voli chest ripensament dal Welfare intune otiche comunitarie, come che al conferme Ranieri Zuttion, diretôr dal Servizi “Aree Welfare di Comunitât”. “Il procès di framentazion de coletivitât nus sburte a dâ rispuestis che a frontin lis emergjencis demografichis e sociâls par tignî in pîts il pat di solidarietât sociâl. Tantis analisis a son stadis fatis tai agns su chescj temis, ma a son une vore pocjis lis esperiencis concretis che a integrin lis variis formis di jutori pes personis che a àn bisugne. Il Bant Welfare al è za indevant, parcè che lis à za realizadis e al va indenant a promovilis”. ❚