Volêt ben ai vuestris nemîs

Il vanzeli de messe de ultime domenie di Fevrâr al comence disint:
Volêt ben ai vuestris nemîs, fasêt ben a di chei che us odein. Benedît chei che us maledissin, preait par chei che us fasin mâl (Lc 6, 27-38).
◆ La prime reazion a chestis peraulis e je: no! No aceti. A son invîts cence tignince che a cancelin la dignitât de vitime intant che a fasin gjoldi e sgagnî i prepotents.
◆ Par dâ il significât just a chestis peraulis dal Signôr, al tocje lei dut il discors che lu clamin “des beatitudins” e tal cjapitul 6 dal vanzeli di Luche. Di chel discors il mahatma Gandhi, un om di religjon induiste, al scrîf: “Par me lis beatitudins a son la veretât. La persone di Jesù e la sô biele gnove no apartegnin ai cristians, ma a son di ducj i popui e di ogni persone di cualsisedi religjon, o ideologjie, o fede, o bandiere. (The Modern Review, Otubar dal 1941). Lis beatitudins a àn valôr universâl, patrimoni de umanitât interie.
◆ Tes beatitudins, la mentalitât di Jesù e je: amôr par ogni creature començant dal prossim fin al nemì, sacrifici di se stes tal afiet fin a dâ la vite, savê ancje pierdi dut e no domandâ nissune ricompense. Une utopie fûr de realtât, che nol è pussibil meti in pratiche.
◆ Ma pûr tant… Un afiet gratuit fin a dâ la vite lu ai cjatât in ciertis fameis cun fîs disabii. Gjenitôrs splendits di sacrifici e di bontât che a continuin a lassâmi plen di maravee e mi fasin dî: “jo no rivarès”.
◆ O ai cognossût une mari che e à assistût cun pazience e amôr il fi drogât fra presons, malatiis, bausiis continuis, robariis e umiliazions. Jê e sopuartave dut e tal so amôr e continuave a curâ il fi. O pensi ai Mercedaris: un ordin religjôs fondât tal secul XIII; i congregâts a fasevin l’avôt di consegnâsi sclâfs lôr stes par deliberâ un presonîr. O pensi a sante Taresie, premi Nobel pe pâs tal 1979, mari dai piês derelits di Calcute deventâts scovacis di perifariis malfamadis. O pensi a don Peppe Diana, copât de camore in sagristie prime di messe, caluniât a no finî e assolt inocent dopo 21 agns. O pensi a Sammy Basso, al so testament, ae mission che te sô tremende malatie, insiemi ai amîs, si jere dât: fâ alc di ben a cui che al à dibisugne e puartâ sperance. Ma o pensi soredut, cence lâ tant lontans e svolâ tant in alt, aes fameis che a vivin tal volêsi ben di ogni dì, che al vût dî ancje netâ, fâ il jet, cambiâ la blancjarie, parecjâ di gustâ, viodi dal vecjo e forsit ancje dal ort, cjapâ la machine, cori sul puest di lavôr… dut chest unît al capîsi, perdonâsi, sacrificâsi un par chel altri, tornâ a fâ pâs, scombati pai fîs ancje se cualchi volte no vignarès voie. Chestis fameis a vivin in cualchi maniere lis beatitudins dal nestri Signôr.
◆ O pensi… Tropis personis no vino noaltris di ringraciâ pal ben che nus àn volût te normalitât e tal cidin? Fermìnsi un moment par passâ te nestre ment il lôr ritrat. Alessandro D’Avenia, un professôr di scuele e scritôr, al segne ogni sere tal diari lis personis che in chê dì i àn volût ben e il so diari al devente un libri maraveôs, risultive di gnove vite par lui.
Volêt ben… fasêt ben… benedît!
Il mont al è plen incolm di mestris e di conseîrs pronts a insegnâti cemût vivi la filantropie, la amicizie, la famee, l’amôr componût e sledrosât in ogni forme. Nestri Signôr in dut chest al è sempliç: nissun nol à afiet plui grant di chel che al da vie la sô vite pai siei amîs (Zn 15, 13). O ringracii i psicolics, ju scolti vulintîr, ma o cîr di deventâ amì des personis che si sacrifichin tal afiet fin a praticâ il volêt ben ai vuestris nemîs.
◆ Volêt ben!… O pensi aes cincuante – cincuante! – vueris che a son cumò tal mont e che ancje se a vessin di finî vuê a continuaran fin cuant che l’ultin frut vuarfin, mutilât, cence une gjambe o cence un braç, al restarà in vite. Fra otante, cent agns? Ce tragjediis!
◆ A disin che il vanzeli al è superât; o disarès che il vanzeli cu lis sôs beatitudins al à ancjemò di començâ. Se une persone e à passion, che e cjapi in man i cjapitui cinc di Mateu e sîs di Luche e che e comenci a lei cualchi rie; li e cjatarà la strade mestre par madurî, tirâ sù la canaie, formâ une societât no violente, no di vuere, ma di dialic, inclusive, umane, di condivision.
I àn domandât a un frut: “Ce regulis vêso in famee?”. Al à rispuindût: “Nissune, parcè che si volìn ducj ben”. ❚