A Zui, inte antighe citât romane di Iulium Carnicum, o cjatìn un prodot che ancje i romans a dopravin cetant inte lôr alimentazion, ven a stâi la mîl.
◆ “La mê e je une aziende piçule – e conte Nicole Paolini, zovine di 33 agns cun cirche 60/70 boçs. O soi partide tal 2020, l’an dal Covid, cjolint dôi boçs e o ai tacât a passionâmi di chest mont, ma mi son simpri plasûts i animâi. Jo o fasevi dut altri, o soi perît informatic e o jeri impleade intune dite a Udin; par dîle dute no vevi propit un bon rapuart cul gno datôr di lavôr. Dopo o soi restade incinte e o ai decidût di stâ a cjase e cussì mi soi dedicade ancje aes âfs. Tal 2022 o ai comprât 20 scuams di un siôr di Paulâr, e o soi lade indevant. O ai fat tancj cors e planc plancut o ai cognossût chest mont. O ai ancje la fortune di vê coleghis (cussì o clami chei altris apicultôrs) che mi scoltin e cun lôr mi pues confrontâ e mi dan une man cuant che mi cjati in dificoltât.
◆ O ai un pôcs di boçs a Zui e altris a Cjavaç; o stoi cirint altris postazions par vê plui varietâts di mîl. In particolâr o stoi studiant cemût fâ mîl di flôr di mont, che al è un grum cirût e paiât ben.
◆ Ma lis anadis di chescj ultins timps no son des miôr e o stoi cirint, dongje de mîl, di integrâ ancje altris prodots come la pape reâl. O stoi pensant ancje di studiâ la produzion dal idromêl, dut chest parcè che la produzion de mîl e je daûr lâ lant al mancul. Al è clâr che dome cu la produzion di mîl no tu vivis.
◆ L’an passât la Regjon e à dât un contribût par judâ i apicultôrs, ma jo no soi rientrade e cussì o ai vût une pierdite di cirche 4.200 euros.
◆ Intal Jugn dal 2024 a Cjavaç mi à fat visite l’ors, che mi à fat un grum di dams. E je stade une stagjon un pôc cussì, ma il savôr de mîl, ancje se e je stade pocje chê che o soi rivade a fâ, al è stât plui bon di chel produsût achì a Zui, parcè che là jù al è un grum di puçâr che al sa di “te al pierçul”. Invezit chel di Cjavaç al veve tant rôl e cjastinâr e dut un altri gust. La mê mîl e je dute di mil rosis parcè che par produsi chel di une sole cualitât (monoflora) al tocje movi dispès i boçs di un puest a chel altri, ma no je mê intenzion fâ nomadisim.
◆ L’an passât al è stât dûr: O ai viodût che lis feminis lis copavin i avons, che a son i prins a jessi fats fûr in timps di miserie nere; par solit a vegnin eliminâts sul scomençâ dal Autun cuant che no coventin plui.”
◆ Il Salet al è il prin lûc di Zui indulà che Nicole e à metût lis âfs. In chescj dîs e je un pôc cjapade parcè che e je daûr a trasferî il so laboratori di Zui inte cjase indulà che e stave sô none.
◆ “Cul gno sisteme – e va indevant Nicole – no pues vê une buteghe, e no pues lâ sui marcjâts; il gno obietîf al è che di cuvierzi la domande dai clients che a son ducj de zone. O fâs lis consegnis a domicili, ma o ai ancje une casselute fûr di cjase in Vie Marco Aurelio 19, dulà che un al cjate il gno prodot che al pues cjoli di bessôl lassant i bêçs inte musine. O furnìs ancje cualchi buteghe. Par me al è impuartant garantî al client il massim da trasparence e de cualitât. Cu la mê pocje esperience o ai capît che al baste un nuie par ruvinâ il prodot.”
◆ Nicole e je lade a fâ cognossi chest mont in cualchi scuele materne dal paîs e e à tal cjâf di disvilupâ altris progjets di chest gjenar par cjapâ dentri ancje i fruts plui grancj.
Par cualsisedi curiositât, si pues stâ daûr ae pagjine Facebook e/o Instagram ‘Il Salet Apicoltura’. ❚