Il mês stât o vin discorût dai grancj Inviers di une volte in Friûl, ricuardant che lis grandis nêfs a son aromai disparidis de nestre planure e vignudis plui raris ancje in mont, almancul sot dai 1500 metris. Al è esemplâr il câs di Nevee, in comun di Scluse, a 1200 metris sul nivel dal mâr. Il non dal puest al è avonde clâr tal so significât, e pûr tal Invier 2023-2024 si àn vûts dome 26 cm di nêf e il 90% des precipitazions invernâls al è vignût jù in forme di ploie. Cun di fat, la scjarsetât de nêf e va daûr dal aument regjistrât intes temperaduris: lis mediis in Friûl a son ladis sù di plui di 1°C dal principi dal secul, secont il “Rapporto sullo stato dell’ambiente in Friuli Venezia Giulia – 2024” mandât fûr de ARPA Friûl-VJ, ma cheste incressite e je ancje plui fuarte in mont.
◆ Si previôt che lis temperaduris a cressaran ancjemò vie pal prossim secul, colpe il riscjaldament globâl di origjin antropiche. Intal “Studio conoscitivo dei cambiamenti climatici e di alcuni loro impatti in Friuli Venezia Giulia” mandât fûr de ARPA Friûl-VJ intal 2018 (dutun cun tancj altris ents di ricercje de regjon) si mostre che, pe fin dal secul, la temperadure invernâl sul Friûl e cressarà di 1.3°C rispiet ae medie 1976-2005 tal senari plui otimistic (ven a stâi, rispietant l’Acuardi di Parîs dal 2015). Intal plui pessimistic, invezit, la cressite e sarès di 5.3°C. Stant che la temperadure e va jù di cirche 0,65°C ogni 100 metris di altitudin, tal prin câs la cuote de nêf si alçarès di 200 metris, intal secont di plui di 800 metris.
◆ Parsore de cuote de nêf, però, al nevearà di plui. Cemût sclarî chest compuartament che al pâr contraditori, ma che in veretât al è dome no lineâr? La rispueste le da la ecuazion di Clausius-Clapeyron. Cheste ecuazion e dîs che la umiditât di saturazion, ven a stâi la massime umiditât che l’aiar al pues tignî, e cres cul cressi de temperadure. O podìn imagjinâ che, par ogni metri cubi di aiar, e sedi une scjatute che e ten dentri dute la umiditât, val a dî il vapôr di aghe. Cheste scjate e je cetant plui grande, trop plui alte che e je la temperadure. Cussì si capìs, par esempli, parcè che tal cûr de Antartide, li che lis temperaduris mediis a son ator dai -50°C, a vegnin jù a pene 1-2 cm di nêf ogni an.
◆ Cun di fat, cul cressi des temperaduris invernâls, si previôt ancje une cressite de precipitazion invernâl sul Friûl, in forme di ploie: il studi dal 2018 al stime une incressite de ploie tra i 10% e i 20% pe fin dal secul rispiet al 1976-2005, daûr dal senari. Al va dit, però, che lis previsions di ploie a son mancul siguris di chês de temperadure, parcè che par che al plovi nol baste che al sedi umit, a vuelin ancje cundizions favorevulis di pression e di circolazion dal aiar. ❚
