ATUALITÂT – No vê pôre di cui e di ce che si è

Une burascjade intune tace di vin. Cheste e je stade le polemiche stiçade de formule «Friulano, tipicamente friulano» doprade par promovi l’ex vin Tocai, ma slargjade ancje ae produzion agro-alimentâr dal Friûl – Vignesie Julie, te leture dal «pari» de iniziative, l’assessôr regjonâl ae Agricolture, Claudio Violino.
Nuie di plui, nuie di mancul. Anzit, no.
Parcè che rivâts insom des polemichis, des barufis, dai velens che a àn dismovût la politiche e i cjampanîi de regjon, massime chei triestins, ce che al reste e je la apatie dai furlans.
«Nissun furlan al à alçât il cjâf par difindi cheste idee», al comente l’assessôr Violino. «Ancjemò fuart al è il «sotanisim culturâl» di chel che, usât a pleâ il cjâf, nol reagjìs plui. Il furlan al à di decidi cui che al vûl jessi».
Cence, cun chest, meti in discussion la unitât de Regjon.
Assessôr, dut al è scomençât de invenzion dal «Friulano, tipicamente friulano» in ocasion de Fiere Vinitaly di Verone.
A son stâts i stes produtôrs a domandâmi tai ultims doi agns la realizazion di un «claim» che al rapresenti dute la regjon e che al vedi dentri la peraule «Friûl», no dome pai vins ma ancje pai prodots agro-alimentârs tant che il persut. Chest parcè che fûr dai cunfins de Regjon, cuant che si fevele di cheste tiere, si pense al Friûl cjapant dentri dut il teritori.
Ve alore che e je nassude la formule «Friulano, tipicamente friulano», leât ae promozion dal ex vin Tocai, che dut câs al è il simbul dal teritori. O vuei sotliniâ che la vît e je coltivade in dut il Friûl e intune piçule part dal Gurizan slâf.
Pe operazion di promozion dal passaç di «Tocai» a «Friulano» o vês inte sachete 10 milions di euros.
Esat. Une ocasion masse golose par cirî di zontâ il tiermin «furlan» a dutis les peculiaritâts de nestre tiere.
O disarai di plui: la formule «furlan» e je evocative te int di valôrs positîfs, tant che la braure, la etiche tal lavôr, la cualitât dai prodots. Chest non al sarà un straordinari mieç di marketing par espuartâ il «made in Friûl» tal mont. Une idee che e je plasude.
A cui, par esempli?
O sielç Gianni Zonin, che al è president de Popolâr di Vicenze e un nomenât produtôr di vins venit. Di subite si è mostrât dacuardi cul gnûf slogan. Lui stes al à confermât che in ogni bande de Italie, cuant che si dîs Friûl la int e capìs Friuli-Venezia Giulia.
In chest moment, o vuei sotlinia, l’impuartant al è vendi. E no mi risulte che la jote, amitût che e sedi triestine, e vegni esportade ator pal mont.
Lis reazions no son stadis masse positivis. A Triest si à fevelât di operazion culturâl leghiste che e smicje a spacâ la unitât de Regjon.
Bufulis. Cualchidun al à tirât fûr vecjis cuistions sore la regjon no dome cun doi cjâfs, ma fintremai cuntun cjâf e un cuarp separâts. Une polemiche no justificate tai cuntignûts.
Si è ancje fevelât di screâ une Doc (Denominazion di origjine controlade) Friûl uniche par dute le Regjon.
In Regjon o vin nûf Doc che a rapresentin lis peculiaritâts dal teritori. Dut câs, o crodìn che une uniche Doc e sedi oportune par rapresentâ ducj, cence gjavâ nuie a nissun. Come assessôrat, par spirt di servizi, o vin preparât une propueste iniziâl di disciplinâr mandade a ducj i Consorzis e aes asociazions di categorie par un confront. Ma che de Doc uniche e scuen jessi une decision condividude di ducj: cence no si fasarâ nuie.
Al è stât puartât l’esempli contrari: chel de IGT (Indicazion gjeografiche tipiche) Venezia Giulia par vins produsût in Friûl.
Chest al sucêt parcè tal 1996 e je stade acetade la domande dal assessorât regjonâl di istituî il IGT Vignesie Julie pal vin di taule prodot in regjon. Nissun si è scandalizât in chê volte.
A Triest la politiche si è sustade.
Ancje se o gjavìn la liniute jenfri Friûl e Vignesie Julie, tai fats, cheste vicende e ferme tant che cuntune TAC che lis diferencis no son stadis superadis. Tal 1963 o vin scugnût, come tantis altris voltis te storie de nestre tiere, sotstâ ae coabitazion cun chei che, plui fuarts, a vignivin di fûr.
Vuê o vin si sielzi cun cui che o volìn stâ, cuntune riflessione vere. Duncje, no dome cirî rapuarts cul Venit, cu la Austrie o la Slovenie ma ancje cun Triest.
Daspò e je ancje une cuistion politiche: il sucès de Leghe e a stiçât il Pdl, soredut la anime An di Triest, spauride di pierdi podê sul teritori.
In sumis, une cumbinazion di fatôrs che la promozion dal «tipic furlan» e à fat sclopâ.
In Friûl no son stadis fatis grandis cjacaris.
Une des clâfs di leture e je che il furlan al plee il cjâf come un venc e al tâs, magari borbotant ator dal spolert, cu la puarte di cjase ben sierade.
Un segnâl une vore pericolôs.
Si è a risi di «sotanisim culturâl». Bisugne decidi ce che si vûl jessi, decidi se fevelâ furlan. E jo o soi convint che la trasmission de culture e scuen passâ pe scuele.
Sonia Sicco