TERITORI. Lûs e scûr intal istât de mont

Lûs e scûr intal istât de mont. Le biele stagjon dal 2008 si siere cun notis positivis ma ancje negativis par chel che al inten il turisim. La dificoltât plui grande e rivuarde la economie, cuntune situazion di crisi che si sint ancje in chest setôr. Spietant i numars uficiâi, la sensazion e je che cjaminant tra i paîs de Val Cjanâl e de Cjargne si viodi mancul int. I otelîrs si lamentin di une diminuzion dai turiscj o, in ogni câs, di un mût diviers di fâ turisim. Feriis plui curtis, mancul spese e “art dal cumbinâ”. La mont furlane però e à distès presentadis un grum di ocasions par divertîsi: apontaments culturâi, manifestazions, rievocazions storichis, sagris di Tarvis a Tumieç.
TRADIZION E INOVAZION_ Dôs ocasions in particolâr a àn metût dongje tradizion e inovazion. La inovazion si è vivude tal tarvisian che ae Madone di Avost al à presentât la Alpenfest, une iniziative nassude cu la volontât di promovi e di celebrâ la convivence storiche des etniis taliane, austriache e slovene, cun iniziativis enogastronomichis, culturâls e tradizionâls che a àn animade la place di Tarvis tra il 14 e il 17 di Avost. Pe tradizion invezit, ce isal di miôr dal “Pali das cjarozules” di Paluce dal 8, 9 e 10 di Avost? Un apontament di no pierdi par dute la Cjargne che in dôs zornadis e torne a puartâ indaûr il teritori ae fature di une volte. Obietîf al è chel di contâ e di tornâ a vivi lis origjins dal popul cjargnel par mieç dal simbul de “cjarozule” e de “louze”, o ben la  slite di len. Doi dîs di fieste tra borcs e contradis, tai cjantons plui carateristics cun musiche, costums rapresentazions e palis: di chel dai “Stroz”, une vecje maniere di puartâ i lens viers il paîs, a chel dal “Seon”, passant pal pali de “Cjame”. Ma il plui impuartant al è che de “Cjarozule”, dulà che lis cubiis a strissinin vie fen e lens ator par un percors, traviers dai borcs. Parcè che turisim al è ancje e soredut riscuvierzi lis tradizions.
Tiziano Gualtieri