La presince de marilenghe
su la place virtuâl dal “web” e cres
“Se no si fevele inte place, une lenghe e je za in menace”. E podarès jessi une gnove detule buine par tacâ a fâ sù un pocje di cussience linguistiche popolâr, viodût che no podìn lâ indevant a platâ il cjâf sot dal savalon: ogni an, il furlan al piert une percentuâl di int che lu fevele (stant aes ultins indagjins, la medie e sarès dal 0,6% ad an, ancje se lant a viodi i dâts dal 1977 e chei dal ultin scandai dal 2014, la percentuâl di fevelants regolârs e je passade dal 75% al 48%). E je vere che, biadelore, lis opinions sul cont de lenghe a son mudadis, cuntune vision simpri plui slargjade al plurilinguisim, ma chest nol gjave il fat che il “po sì po” al sedi daûr a rivocâ simpri mancul te nestre tiere. Il furlan, in dì di vuê, al è stât ricognossût de UNESCO tant che lenghe in pericul seri (rapuart dal 2009), intune conferme no dome dal numar simpri plui bas di fevelants, ma ancje de mancjance di trasmission intergjenerazionâl (e no stin a fevelâ dal insegnament te lenghe mari, che di chel o ‘nt fevelarìn tune prossime pontade).
◆ Lis placis sono daûr a disvuedâsi de nestre lenghe? Chês dai paîs forsit sì, ma chês virtuâls, in cuintritindince su dutis lis spietis, a somein ‘siminâ di vite. Une resistence zuiarine e trapolone, che si slargje te rêt lant ae concuiste di pagjinis e social, cimiant simpri di plui ai zovins.
◆ Lassant di bande i sîts istituzionâi dai ents che a àn a ce fâ cu la lenghe furlane (a proposit: no stait a dismenteâsi di dâi un cuc ae nestre cjase virtuâl, ancjemò plui biele e siore di contignûts), il furlan prime al à rivât a concuistâsi un so puest jenfri lis lenghis de tastiere, par dopo rivâ a jentrâ tal cjâf di Telegram e ancje di Facebook (se no le vês ancjemò provade, lait a sgarfâ tes impostazions), che po al è ancje il social plui vivarôs par “cjacarâ”, ancje se no mancjin lis esplorazions intes tieris di TikTok (“Tic e Tac Furlan” cun Greta Fabbro), di YouTube (“YoupalTubo” al è dome l’ultin di tancj altris canâi li che si pues cjatâ il furlan) e di Instagram.
◆ E se o crodês che a sedin dome fufignis digjitâls, us din cualchi numar di trop che a plasin lis pagjinis FB plui popoladis:
- Average Furlan Guy, 108.000 mi plâs (pagjine di zovins par fâsi cuatri ridadis, ancje cun auto-ironie)
- La Patrie dal Friûl, 28.000 (âstu metût il to “mi plâs”?)
- Il grup “Achì, si scrîf e si rît NOME par furlan (e par cjargnel)!”, 22.500 membris (par ridi, ma ancje par imparâ alc de lenghe)
- ARLeF, 20.200 mi plâs (pagjine de Agjenzie regjonâl, che però si gjave vie la golarine istituzionâl par proponi zûcs e interagjî cul public)
- Ente Friuli nel Mondo, 18.500 (cu lis gnovis dai Fogolârs furlans tal forest)
- Radio Onde Furlane, 9.100 (par jessi inzornâts su lis trasmissions ma ancje sui events)
- Societât Filologjiche Furlane, 8.100 (cun informazions su events e publicazions)
◆ In sumis, al somee che la muart no sedi propit cussì dongje a vignî e che la ultime bataie, forsit, o varìn propit di zuiâse in cheste maniere. E voaltris, sêso pronts a impugnâ la vuestre surîs tant che spade? ❚
