Aziende Agricule Fabiani Elisa

La Aziende Agricule di Fabiani Elisa e je nassude tal 2022 inte frazion di Lorençâs di Tumieç. “O ai simpri vût la passion pe agriculture e pai lavôrs tal ort e tai cjamps – e conte Elisa – o jeri aes elementârs e vie pes vacancis estivis o partivi cun gno nono, che al veve miluçârs, cu la machine di seâ e o lavin a seâ, a cjapâ sù miluçs (al faseve cuintâi e al veve tantis cualitâts vecjis). Indulà che o stoi o ai cirche 5.000 metris dome di prât di seâ. Dopo che o ai vût gno fi, in graciis di cheste mê passion pe nature, tal 2022 o ai tacât a meti jù lis primis 90 plantis di “clasimas” (cerniculis) – o ai 3 cualitâts e la racuelte e va di fin di Jugn a metât Avost). Mi plaseve però meti ancje altris piçulis pomis e cussì l’an passât o ai metût jù 700 plantis di lampons (o ai dôs varietâts e la racuelte a va da metât di Zuin ai prins di Setembar) e 100 di moris (o ai 2 cualitâts e la racuelte e je di Lui ae fin di Avost). O rivi a furnî diviersis scaletariis locâls e clients privâts.
◆ In plui, viodût che cuant che la int e vignive a cjoli lis pomis mi domandavin ancje ûfs, in Setembar dal an passât o ai cjolt 50 gjalinis di ûf e lis ai metudis intun gjalinâr mobil cu la idee che se une altre dì o ai voie di slargjâ, si pues movilu in altris tocs di vert (spes lis moli dongje dai lampons, a àn plui di 4000 metris par balinâ). Ancje cheste e je stade une biele sodisfazion: podê cjapâ sù i ûfs che a van vie simpri! Par solit si scuen prenotâju une setemane prin.”
◆ Elisa e vent ancje prodots dal ort. “L’an passât – e conte – o vevi produsût cetant ma chest an o soi lade un tic al mancul parcè che la culture des pomis piçulis mi puarte vie un grum di timp e no rivi a stâi daûr a dut.
◆ O scuen jessi ogni dì a cjapâ sù. Soredut i lampons a madressin un pôc par volte ogni zornade e no pues lassâju sù tant, se di no no ju pues vendi. Ogni dì, dome par chest lavôr, mi van cirche 2/3 oris. O ai fat un ort un pôc plui grant di chel pe famee, cussì se chei clients che mi domandin cocins o alc altri, o rivi a contentâju. Fasûi, invezit, o ai scugnût meti une file di plui chest an parcè che o ai vût plui domande. I prodots che o prodûs no àn la certificazion dal biologjic parcè che mi costarès masse, o ai inmò une produzion piçule, però al è come se a fossin biologjics: l’an passât o ai comprât lis “gjalinutis di Sant Vît” (mariutinis) par che a mangjassin i pedoi des “clasimas”. O dopri la zeolite, che e je une piere fruçade, e ram. No doi sù nuie altri. Al è dome par evitâ un cost che al pese in cheste piçule aziende e o ai miôr gjestî i bêçs che a laressin par vê la certificazion “bio” par cjoli gnovis plantis e alc altri.
◆ Il prin an o ai podût puartâ lis pomis a fâ marmeladis intun laboratori di Rivis Darcjan. Chest an o speri di rivâ a fâ cualchi marmelade di moris e lampons. O dîs ‘o speri’ parcè che la domande dal prodot fresc chest an e je di plui dal an passât e no mi son inmò vanzâts prodots. O ai int che e ven sù di Glemone par cjolis par fâsi lôr la marmelade.”
Di Invier no si polse: si scuen cerpî lis plantis, sistemâ i terens e fâ manutenzion aes struturis indulà che a corin lis plantis.
◆ Une robe che mi plasarès fâ, e sarès chê di creâ un gno laboratori par trasformâ di bessole i miei prodots. Viodarìn se tra un pôc di timp o rivarai a fâlu. Pal moment o soi cetant contente de mê aziende. La mê zornade e je impegnative: o ziri dut il dì tra consegnis, racuelte des pomis, spietâ i clients che a vegnin a cjoli i prodots. O soi simpri ative, ancje di sabide e domenie, e soredut simpri cul telefon daûr par jessi pronte a rispuindi aes dibisugnis de int. O dopri cetant la pagjine Facebook pe comunicazion des novitâts e pai inzornaments sui miei prodots.” ❚