Lis medaiis di aur di Mara Navarria e Giulia Rizzi, il bronç di Jonathan Milan, il record talian di Sinta Vissa: miôr di chel che al è rivât di Tokyo
Parîs miôr di Tokyo pai atletis furlans ai zûcs olimpics? A viodi ce che i rapresentants de Patrie furlane a son rivâts a tirâ dongje, al somee che al sedi propit cussì. La Olimpiade in tiere di France, la edizion numar 32 dai Zûcs a cinc cerclis, nus à puartât trê medaiis, il stes numar de edizion di trê agns indaûr. Intal 2021 a jerin rivâts il bronç di Mirko Zanni tal solevament di pês, il bronç di Mara Navarria cu la scuadre di spade e il cetant preseât aur di Jonathan Milan cul cuartet dal inseguiment in piste di ciclisim. Dut câs, chest an, Mara e Johnny si son confermâts sul podi des dissiplinis indulà che a vevin bielzà vinçût a Tokyo. Giulia Rizzi e je stade une zonte straordenarie ae scuadre di spade e, contant il cuart puest di Asya Tavano intal judo a scuadris, il cuart di Luca Braidot intal ciclisim fûr strade e il cuart di Sintayehu Vissa intal fonts dai 1.500 metris, indulà che la zovine di Possec di Bertiûl e à otignût il record talian, o vin di jessi une vore contents.
◆ De Regjon Friûl – Vignesie Julie, a Parîs a son lâts sedis atletis: Michela Battiston, Luca Braidot, Stefania Buttignon, Elena Cecchini, Jana Germani, Alice Gnatta, Jonathan Milan, Manlio Moro, Mara Navarria, Alex Ranghieri, Matteo Restivo, Giulia Rizzi, Antilai Sandrini, Asya Tavano, Veronica Toniolo e Sintayehu Vissa. A lôr, il president dal CONI regjonâl Giorgio Brandolin ur veve domandât di fâ la figure miôr che si pues. Dit e fat. E al sarès di meti in cont ancje la impuartance che al à vude Daniele Molmenti, il campion olimpic a Londre dal 2012 cu la canoe, inte medaie di aur di Giovanni De Gennaro, atlete di Bressie che Daniele i è stât daûr come alenadôr.
◆ “O soi une vore braurôs dal nestri moviment – al à dit Brandolin, fevelant cui gjornaliscj, daspò che la Olimpiade e je finide –. Forsit, si podeve fâ un tic miôr in cualchi altre dissipline, dut câs il sport al è cussì. Inte scrime, Mara e Giulia, insiemi cun altris dôs atletis de Sicilie, a àn tignût dongje dute la Italie. Milan si è confermât come un dai miôr atletis dal mont inte piste e la velocitât, e al è ancjemò zovin. Al varà altris pussibilitâts olimpichis. E no vin di dismenteâ la Paralimpiade, indulà che o lin a cirî altris sodisfazions: dut câs, ae fin di Setembar o fasarìn une fieste cetant grande”.
◆ Dute la regjon, ancje i politics, a àn batudis lis mans pai risultâts.“Chei che il Friûl – Vignesie Julie al à vivût intal mês di Avost olimpic – al à zontât il vice president Mario Anzil, che al è ancje assessôr regjonâl al sport – a son stâts dîs emozionants, prin cul aur di Mara Navarria e Giulia Rizzi, e daspò a Buie, cul bronç di Jonathan Milan. Pe nestre int e je stade une grande sodisfazion. Il zovin ciclist, che al è tornât vitoriôs inte sô patrie, rinfuarçât di un gnûf ricognossiment che nus fâs ducj braurôs, al devente un model par ducj e al sburte a supuartâ realtâts impuartantis pai nestris zovins e pal sport intune regjon che e à ancjemò tant di dâ. Jonathan al cjatà prin di dut inte sô famee – lis peraulis di Anzil – la tiere miôr che lu à fat cressi e rivâ a obietîfs impuartants a nivel talian, european e globâl. La sô fuarce e vignive dal incoragjament, de motivazion, dal entusiasim e dal desideri di fâ ce che i vevin insegnât i esemplis preseâts di so pari e di so nono. Al è impuartant ricognossi e jessi intun nucli just: che al sedi il cercli dai amîs, il teritori o la comunitât. Une dimension che e facilite in mût mirabil lis inclinazions e lis passions naturâls dai nestris fruts, sburtantju a meti adun i lôr siums e a lâ passâ i lôr limits. Chest al è ce che o cirìn come Regjon, sigûrs che il mont dal sport al savedi puartâ indenant une cressite armoniose, il rispiet e la avualitât”. ❚
:::::::::::::::::::::::::::::::::::::::::::::::::::::::::::::::::::::::::
Mara Navarria e Giulia Rizzi: lis dôs regjinis di spadis
Lis veteranis furlanis
a àn vinçût l’aur inte gare a scuadris
Sierâ une cariere di nivel mondiâl cuntun aur olimpic al è il plui biel sium che un atlete al pues vê: Mara Navarria, di Cjarlins, e je rivade a meti adun dut, pe sodisfazion sô, de sô famee e di ducj i siei tifôs. “O vevi bielzà visât – e à dit Mara la sere de fieste a Cjarlins, tal mieç de sô int – che lis garis da la Olimpiade di Parîs a saressin stadis lis ultimis de mê cariere. No ai mai molât: o ai lavorât une vore, o soi rivade tant indenant e cumò par vê une fieste come cheste culì, inte mê citât, cui alpins che a cusinin, la famee, i vecjos amîs a condividi il moment, ancje chei che a rivin di Rapallo, dulà che o ai passât tancj agns di alenaments, al è biel. O soi une vore contente. O ai finît cuntune vore di sucès, no podevi domandâ di plui. In France o vevin une scuadre di atletis espertis: al jere il 2014 cuant che o vin scomençât il nestri viaç sportîf insiemi e cumò, vincint la medaie di aur, a Parîs, par la Italie e – parcè di no? – pal gno Friûl, al è une vore biel”.
◆ Di bande sô, Giulia Rizzi e vîf une sensazion di no crodi.
“O soi tant contente che mai – e à dit Giulia Rizzi, che dome cualchi setemane prime de finâl di Parîs e veve vinçût il titul di scuadre european –. Vinci une medaie olimpiche al è simpri stât il gno sium. O ai simpri crodût te mê scuadre, ancje intai moments plui complicâts. Cumò o mi gjolt il moment: il benvignût che o ai cjatât tal gno Friûl cuant che o soi tornade a cjase, al è fantastic!” ❚
::::::::::::::::::::::::::::::::::::::::::::::::::::::::::::::::::::::::::::::::::::
Sinta Vissa: la emozion par un gnûf primât storic
La atlete di Bertiûl cumò e je la taliane plui svelte di simpri intai 1500 metris
Il miôr timp talian sui 1500 metrots al jere di Gabriella Dorio, fat in tal 1982. A Parîs, Sintayehu Vissa, zovine di Possec di Bertiûl, in semifinâl, e je rivade a fâ miôr. La Dorio, che e à vinçût l’Olimpiade a Los Angeles 1984, e veve fat 3’38″65, 42 agns indaûr. Sinta e je stade bule intal bati un dai record plui vecjos da la atletiche taliane: 3’58″11. Un timp che al no l’è stât a vonde par cualificâsi in ta la finâl di Parîs, dut câs si scuen bati lis mans. “Di no crodi – e à dite la Vissa –: o speravi di fâ ben, o ài fat sacrificis. O ài dât dut ce che o vevi e o soi une vore contente”. ❚
::::::::::::::::::::::::::::::::::::::::::::::::::::::::::::::::::::::::::::
Trê agns dopo di Tokyo, Johnny al è simpri un dai miôr
Il velocist di Buie si conferme fenomenâl intal sburtâ la biciclete a alte velocitât
Trê agns indaûr, a la Olimpiade di Tokyo, Jonathan Milan al veve concuistât l’aur inte specialitât dal inseguiment a scuadris. A Parîs al è rivât il bronç, batûts dome da la Australie che e à regjistrât il record dal mont. Dut câs, une conferme spetacolâr dal talent dal ciclist di Buie, simpri tra i prins atletis intal mont cuant che al è di sburtâ la biciclete a velocitâts di no crodi.
◆ “Al è vêr che chel di Tokyo al jere un aur – al à dit ‘Johnny’, dopo tornât a cjase de France –, ma cheste di Parîs e je une medaie di bronç maraveose. Come scuadre o vin lavorât une vore par ripetisi: o vin dât il 110% in ducj i alenaments e in dutis lis garis e duncje o cjapìn chest tierç puest come une vitorie. O sin stâts batûts di un aversari une vore fuart e i nestris altris concorints a jerin di nivel alt, ma lu savevin za di prin. O vuei dedicâ la medaie ae mê morose Samira e ae mê famee, che mi son simpri stâts dongje. E, par fuarce, ae scuadre: Filippo Ganna, Francesco Lamon, Simone Consonni e ancje Manlio Moro – zovin di Pordenon, ndr –, che al è simpri stât a disposizion e nus à sostignût une vore.”
◆ Il futûr isal dut par lui spietant la prossime Olimpiade, a Los Angeles intal 2028? Viodarìn! ❚
