Cjaris vacancis… Vacancis cjaris… par ducj!

Il stereotip dal talian surian e profitadôr intai confronts dal turisim al sta, juste apont, lant in vacance! Dulà? Propit in Austrie, là che nissun al varès mai pensât, almancul di bande di chei che no àn mai vivût là tant che forescj.
◆ Un post di un famôs opinionist austriac di çocje carinziane al sta metint in bulidure il dulintor dal Wörthersee. “Il turisim carinzian pe plui part al fâs stomi!” a son lis peraulis testuâls, compagnadis di un scontrin par dôs personis di un ristorant de zone, là che a son marcâts 3,50 euros parom pal cuviert e nuie di mancul di 8,00 euros par un plat vueit extra, di doprâ par dividisi un stuzighet.
Il ristorant si discolpe contindint che, dut câs, i coscj extra a son in liste ben in grant su la prime pagjine dal menù. Ben si intint che al sarès un fal dal client, che nol à vût vonde atenzion, si che duncje il ristorant nol varès nissune colpe, ancje fasint cont che il client – l’opinionist che o vin fevelât – si sarès rindût cont dai coscj extra dome cuant che al jere tornât a cjase.
◆ Cemût ise che il client nol à fat nissun riclam sul puest, cuant che al veve di paiâ? Il ristorant in cuistion – ma e je une usance che si sta slargjant come il vueli – nol stampe plui ni faturis ni scontrins, ma ju spedìs vie e-mail, dome su richieste e intun secont timp.
◆ Ben clâr che l’opinionist nol à nuie cuintri dal ristorant in se, là che dut câs si mangjarès une vore ben, ma culì si trate di une cerce des usancis de ristorazion ator dal Wörthersee e in Carinzie in gjenerâl. Cetancj di lôr no vuelin vê i turiscj, intant che altris a pensin di insiorâsi in mût sfrontât. Chest al scomençarès de gastronomie, passant par ducj i events stagjonâi, par finî cu la mancjance di visions e ufiertis pai periodis di brut timp.
Il diretôr aministratîf de regjon turistiche Wörthersee-Rosental al ribat aes critichis, sostignint di savê, su la fonde di intervistis fatis sul puest, che la opinion dai ospits sul rapuart presit/prestazion in gastronomie al varès bisugne di cualchi miorament. Pe ospitalitât in hotel no sarès cussì. In gjenar a son tancj i esercizis valits, che a varessin di jessi fats cognossi miôr. Cun di plui i uciei strupiâts no si cjataressin dome in Carinzie, e nô int savìn alc, ancje se o vin clâr che no sin simpri i unics intal mieç de bissebove.
◆ Su chest argoment, ve ca une altre gnove publicade di un cuotidian austriac.
◆ Si sa che tancj austriacs vie pe Istât a passin lis lôr vacancis sul Adriatic intal Nord de Italie, ma cul cjaldonon di Avost ancje il fresc des aghis furlanis al calamite i turiscj. Cualchi dì prime de Madone di Avost une sorprese pôc plasevule e à brincât cualchi turist austriac, che si stave rinfrescjant intal dulintor di Pieris, cuant che al è tornât li de sô auto. Cualchi machine parcade sot dal puint de ferade sul Lusinç e jere stade sfuarçade, ma – tant che al scrîf ancje un cuotidian locâl – viôt po, a jerin stadis scassinadis dome chês cun targhe foreste, là che a jerin stâts puartâts vie documents e tacuins che, cence prudence, a jerin stâts lassât dentri.
◆ Si trate, ben clâr, di criminâi, ma salacor cualchidun si vise di cuant che al jere cetant pericolôs par nô pendolârs dal mâr parcâ in mût pôc regolâr dulinvie des stradis di une citadine di mâr (e no dîs cuale), cjatant po multis saladis… viôt câs dome sui veris des machinis cun targhe taliane. Par chês forestis si sierave un voli. Ma ce isal un diviêt di soste a pet des distruzions vandalichis che a vegnin petadis ogni àn a Pasche di Rosis?
Si sa, al è plui comut viodi un fros intal voli di un altri, che no viodi la trâf intal nestri. ❚