TERITORIS – INTERNAZIONÂL. Gales: critichis al guvier pe gnove leç di tutele de lenghe

«La leç presentade di resint dal guvier no sigure un status di couficialitât de lenghe e nancje il dirit di gjoldi di servizis ancje par galês». Cheste e je la critiche di fonde che e rive de Cymdeithas yr Iaith Gymraeg, une associazion ative te bataie par fâ valê i dirits linguistics dai galês, cuintri de ultime leç prontade dal guvier locâl.
Jenfri lis novitâts plui impuartantis de normative, al è l’oblic pes compagniis privadis che a davuelzin ativitâts di interès public (telecomunicazions, traspuarts, lûs, gas e vie indevant) di garantî l’ûs dal galês intai rapuarts cui utents. Cun di plui,  al sarà nomenât un comissari pe lenghe che al cjaparà sù i compits che fin cumò al veve davuelt l’Ufici pe lenghe galese, ma che al varà ancje la pussibilitât di intervignî in maniere direte in difese dai dirits linguistics dai citadins. Stant al prin ministri galês Carwyn Jones, si trate di un pas indenant pardabon storic; te maiorance che e poie il guvier a son di cheste opinion ancje i nazionaliscj dal Plaid Cymru, mintri che lis reazions di liberâi-democratics e conservadôrs a son stadis plui clipis.
I esponents de Cymdeithas yr Iaith Gymraeg a àn invezit scrit daurman al prin ministri marcant che il guvier al à tradît lis promessis fatis in campagne eletorâl su la lenghe galese, massime sul status di couficialitât de lenghe, su la mancjance di garanziis pal ûs dal galês intes grandis compagniis privadis e su la indipendence dal comissari pe lenghe. La associazion e presentarà une liste dai ponts debui che si cjatin te gnove leç e po e inviarà une mobilitazion par dâi cuintri ai plans dal esecutîf galês. Za cumò e je in linie une petizion dulà che si domande al guvier di rispietâ lis promessis su la lenghe fatis dilunc de campagne eletorâl (http://deiseb.cymdeithas.org).
CARLI PUP