Triest, provincie di Davian

Provìn a doprâ la fantasie par fâ un pocje di fantastrategjie gjeopolitiche.
◆ Che il teritori furlan metût, come che al è, tra mont slâf, mont todesc e mont latin, plaçât tra lis Alps e il mâr Mediterani, tal mieç de Europe al sedi, te realtât storiche strategjic, lu savìn di simpri. Prove e je che la plui grande potence mondiâl dal mont antîc, Rome, e à fondade culì une colonie soredut militâr come che e jere Aquilee par controlâ i confins dal imperi e come base logjistiche par altris concuistis a soreli jevât. Doi mil agns dopo, la plui grande potence dal mont contemporani e à fondade culì – cincuante agns indaûr – la base aerie plui impuartante dal continent a Davian par controlà la tendine di fier e i confins dal mont ocidentâl. E cheste sorte di protetorât american sul Friûl nol à dome efiets negatîfs, nus disin, ma ancje valencis sociâls impuartantis e oportunitâts economichis.
◆ Par esempli, prin o dopo la vuere in Ucraine e varès di finî. E alore ducj a son daûr a preparâsi par tornâ a fâ sù chel stât sdrumât di tantis bombis e di tancj drons. Soredut i Paîs ocidentâi, cui Stâts Unîts a cjâf, si parecjin pe ricostruzion. Al coventarà un puart par dutis lis logjistichis e i traspuarts. E il mâr plui sigûr, viodût che il Mâr Neri al è masse dongje di Putin, al sarà dal sigûr l’Adriatic cul puart di Triest che si candide a jessi il lûc plui just par zuiâ chest rûl. No dome par vie de vicinance cun Kyiv, ma ancje pes carateristichis di profonditât dai fondâi e pe presince di viis di colegament strategjichis: feradis, viadots, oleodots, rigasificadôrs. Ma ancje par vie che, de aministrazion aleade dal post seconde vuere mondiâl incà, i leams cui yankees a son stâts simpri di nivel alt. E ancje viodût che Triest al à za dimostrât di vê i anticuarps par resisti a altris “tentazions”, in primis chês dai cinês de “vie de sede”. Se dopo i zontin i rapuarts bonons cui USA dal president de zonte regjonâl F-VJ, clamât a Washington un dì sì e chel altri ancje, o podìn capî che pe “citât martare” si vierzin prospetivis economichis une vore stuzighinis.
◆ Baste che e finissi la vuere!
E, soredut, che Macron nol tegni dûr cul proposit di mandâ trupis militârs de NATO a judâ Zelens’kyj. In chest câs, il puart triestin plui che pe logjistiche economiche al sarès il plui indicât pai puarteavions e cjacetorpedinieris, viodude la vicinance cu la base americane di Davian che e deventarès sigûr il centri di dutis lis operazions belichis. Ma ancje target prioritari di ducj i missii supersonics di Putin…
◆ Pal Friûl no propit une biele prospetive. Sperìn che chestis riflessions e restedin.. “fanta”… ❚