Sfuei Mensîl Furlan Indipendent
Archivi de Patrie

SPECIÂL. La racuelte Gardner

............

Tal 1904 Theodor Gartner (glotolic e ladinist de Universitât di Innsbruck) al fo incaricât dal Ministeri austriac pe Culture di puartâ indenant une part di une ricercje etnomusicologjiche plui slargjade e sistematiche sul cjant popolâr, davuelzude in dutis lis regjons e nazionalitâts dal Imperi asburgjic. Lui si ocupà de part des lenghis ladinis; tant par dî, de part ongjarese de ricercje si ocupà Bela Bartok.
Tal 1914, la ricercje e fo smetude a sec, cuant che la Grande Vuere e segnà in maniere dramatiche la fin di chê imprese;  al restà però un corpus di plui di 4200 cjants (tescj e incipit), cun sù par jù 740 trascrizions musicâls. Dopo che al colà l’imperi austroungaric e daspò des vicendis tragjichis che i vignirin daûr, dut il materiâl cjapât sù al le sparniçât e al restà bandonât e dismenteât fin te seconde metât dai agns Novante, cuant che lu tornarin a cjatâ in circostancis tant aventurosis che fortunadis.
Vuê al è tornât ae lûs in gracie di un lavôr specific decenâl, puartât indevant dal Istitût Culturâl Ladin “Majon di Fascegn”.
La part plui rilevante e je dal sigûr chê des vilotis furlanis, cjapadis sù in grant numar tal Gurizan. E si à di pensâ che chel teritori – che in chê volte al jere sot dal Imperi – al è dome une piçule part dal Friûl che al cjantave vilotis.
Une opare che, di là dal interès etnomusicologjic, e à dentri une documentazion straordenarie sul plan linguistic, storic e culturâl. Un esempli de vite musicâl e culturâl dal timp, che al contribuìs ancje a butâ une lûs gnove suntun moment critic pe storie des Vals ladinis, dal Trentin e dal Friûl di Soreli Jevât, che a jerin daûr a viodi a disfâsi l’Imperi austroungaric e a afrontâ lis inciertecis di un mont gnûf.
Dree Venier

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +