Energjie in Regjon

E jere une volte (ma e je ancjemò) la APE, une Agjenzie provinciâl (di Udin) pe Energjie, nassude di un progjet european e de buine volontât di cualchi anime ben preparade sul argoment. E jere partecipade de provincie di Udin, abolide de Serracchiani (la regjon no je subentrade, e za li…) e di une schirie di comuns furlans che si zovin de consulence de agjenzie pes cuistions leadis al sparagn energjetic, al impat ambientâl, ae sostignibilitât des infrastruturis di produzion e di traspuart. Une istituzion che zaromai e funzione, cun plui di 15 dipendents, cun sede a Glemone e cun tancj sportei in dute la regjon, tant di ca che di là dal Tiliment. Un servizi une vore preseât dai ents locâi ancje pe creazion des comunitâts energjetichis tant di mode, almancul a peraulis, in chest periodi.
◆ Impuartante par esempli la consulence a un comun de Cjargne dulà che al passe l’oleodot de SIOT e dulà che, su la fonde dal progjet, e varès di jessi implantade une des cuatri centralinis a gas metan par scjaldâ il petroli che, cussì, al larès sù di Triest in Gjermanie plui svelt. Dut paiât cui certificâts verts de Europe, che a puartaressin tes cassis de SIOT plui di cualchi euro. Ma isal un progjet che al sta in pîts? Isal sostignibil? Al domande il comun cjargnel. E la APE e rispuint: grant impat ambientâl cun tante CO2 inte atmosfere, e dal pont di viste economic tantis palanchis tes sachetis de SIOT. E cuatri centralinis tal paisaç furlan.
◆ Un esempli jenfri i tancj dal alt nivel tecnic e di trasparence che la agjenzie e prodûs a pro dai comuns e dal teritori, e par chest si spietaressisi che la regjon F-VJ i des une man. E invezit, prime e taie chei pôcs contribûts che i deve pe gjestion dai sportei, e po dopo e cree di plante fûr une societât pe gjestion des stessis robis, partecipade al cent par cent de stesse Regjon: ‘FVG Energia’.
◆ Lis robis che a funzionin a ruvinin la place. Miôr fâur cuintri.
Cumò però, di là de concorence ae APE, si spietìn di FVG Energia che – prime di dut, ae scjadince dai contrats, la gjestion des centrâls di Somplât e di chês altris che a doprin la aghe cjargnele e che a puartin beneficis e util a Milan e a Bressie e vegni puartade dentri de nestre regjon, come che a àn fat in Sudtirôl plui di 25 agns fa: 18 su 19 centrâls idroeletrichis passadis tal 1998 sot dal control de provincie di Bolzan; – in secont lûc, FVG Energia e varès di jentrâ te societât di gjestion dal oleodot de SIOT, 145 chilometris di condote che e travierse di Sudest a Nordovest dut il Friûl, passant adiriture te prese de aghe dal CAFC a Mulin dal Bues, dulà che se par câs la conduture e ves di pierdi, plui di otante comuns a restaressin cence aghe di bevi.
◆ La SIOT le àn in man lis ‘siet sûrs’ dal petroli. Rivaraial il president Fedriga, tai siei viaçs a Washington, a otignî une partecipazion, ancje piçule e magari dome simboliche, intune infrastruture che e passe pal Friûl, e dopre teritori e no i lasse nuie? ❚