Parcè “Salvan”? “Di pôcs mês o ai cambiât il non de aziende agricule ‘Vecjo Mulin’ parcè che nol esprimeve plui in maniere juste chel che o fâs” – cussì al conte Marco Zozzoli di Dieç, che dal 2014 al à vierte cheste ativitât che si ocupe principalmentri de produzion e de vendite di ortaiis e sorc pe farine.
◆ “Di subit – al va indenant Marco – o ai tacât cul biologjic, ancje parcè che o ai volût cussì e no viodevi alternativis: pitost no varès fat nuie. Dopo o ai tacât a studiâ gnovis tecnichis di coltivazions par vê prodots dal dut naturâi. O ai doprât tecnichis di agriculture rigjenerative e sinergjiche: dutis pratichis che a cjalin il prodot naturâl di plantâ e soredut a dan impuartance ancje ae conservazion dal ambient. Se o planti un prodot che tal stes timp al impuarìs l’ambient, in realtât no stoi fasint une grande robe. Il prodot nol à di pesâ sul teren là che al ven metût!
◆ O ten ancje lis gjalinis di ûfs. Il gno gjalinâr al è mobil parcè che al à une funzion impuartante: chê di coltâ la tiere dulà che lu met. Il prossim an, chel puest al podarà deventâ un cjamp di sorc, cence contâ che il ledan des gjalinis al ridûs la nassite des jerbis spontaniis e al ten lontans i insets.”
◆ Marco al à studiât perît mecanic e, jessût de scuele, al à lavorât par un pâr di agns intune fabriche, ma “nol jere par me – al conte – e duncje o ai lassât stâ e o ai començade cheste ativitât cun cjamps di piçulis dimensions. Dopo o ai tacât a slargjâmi di plui, o coltivi une biele cuantitât di teren. Achì in Cjargne o vin tocs ca e là: graciis ai miei paisans o ai rivât adore di vê trê tocs grancj e tancj tocuts sparniçâts ator te biele plane di Dieç. Tra orts, cjamps di cartufulis e fasûi e prâts, o soi sui siet vot etars.
◆ La mê clientele in gjenar e je privade, soredut dal puest, che e cognòs benon il lavôr daûr di ogni prodot. E di chest o soi content! Al è un cuintrisens fâ robe particolâr e vendile tal grant marcjât. O ai miôr vê plui cualitât di prodot che cuantitât. Par me al è ridicul vendi tancj prodots che no san di nuie.”
◆ Marco al è impegnât dut il timp dal an, dal periodi che si dediche a sistemâ la tiere, al plantâ sedi in Primevere che di Atom, al cjapâ sù i prodots; in Fevrâr al prepare la farine e v.i. Tai timp muarts (di Dicembar a Zenâr) al va indevant cun altris lavôrs, par esempli cul fâ serais di mût che i animâi no ledin a fâ fieste tai plets.
◆ Une altre biele passion di Marco e je chê dal recupar des varietâts di ortaiis di une volte (al à une colezion di semencis di cirche 300 varietâts) e su chest al dîs: “o soi daûr a recuperâ lis semencis des cualitâts locâls, ma o cîr di recuperâ ancje chês di prodots particolârs. A son tancj prodots che no vegnin coltivâts parcè che no rindin o parcè che a àn formis particolârs: jo o voi a cirî ancje chest!
◆ Cuant che o ai tacât a ocupâmi di racuei lis varietâts dai prodots, fintremai i miei di cjase no i crodevin… la int e presee di plui chest gjenar di prodot, e cuant che lu compre e pense di vê in man une novitât: invezit, in realtât a àn une varietât che e à plui di 50 agns.”
◆ Al sarès inmò ce contâ, ma se cualchidun al à gust al pues stâi daûr a Marco tant su la pagjine https://www.facebook.com/aziendagricolasalvan che su Instagram,m e inmò miôr lant a cirîlu te biele campagne di Dieç. ❚
Marco Zozzoli, un “Salvan” a Dieç
Marta Vezzi
