La fuide

Intal zardin zoologjic di Lignan, tra lis tantis bestiis che a jerin sieradis dentri, al jere un zovin lama.
A lui i plasevin tant i fruts che a passavin denant de sô chebe e lu saludavin e i butavin alc di mangjâ.
Ma al jere tant malinconic parcè che i pareve di jessi metût in preson e al veve tante nostalgjie de tiere indulà che al jere nassût.
◆ Al veve fate cognossince cuntun alpaca che al jere sierât inte chebe tacade de sô. Un pôc a la volte a vevin fate amicizie e si jerin inacuarzûts di vê ducj doi chê stesse smanie di lâ vie di chel puest.
Il lama al pensà che une soluzion e jere, e al le a contâle al alpaca:
“Sint, jo o pensarès di scjampâ di chest puest vie pe gnot.”
“Orpo, tu âs vude propit une biele pensade. O soi dacuardi cussì tant cun te che o soi pront a vignîti daûr,” i disè l’alpaca.
◆ Cussì, i doi amîs, profitant dal scûr di chê gnot cence lune, a scjamparin vie.
A traviersarin tancj cjamps e tancj borcs e a rivarin intun puart di mâr.
A saltarin dentri de prime grande nâf che a vioderin, e a si scuinderin sot di un grant telon.
◆ La nâf e gjavà lis ancuris e e partì par un puest no cognossût.
Daspò diviersis zornadis di navigazion, la nâf e rivà intun puart.
Il lama e l’alpaca a saltarin fûr di sot dal telon e svelts a dismontarin de nâf.
A pene poiadis lis çatutis par tiere, si inacuarzerin che sot e jere dute glace: a jerin rivâts intal Pôl Nord!
“BRRR… ce frêt!” al spesseà a dî l’alpaca.
“O ai bielzà un principi di conzelament,” al zontà il lama.
◆ Ducj inglaçâts, i doi amîs a spessearin a tornâ sù la nâf e a taponâsi cul telon.
Fatis lis operazions che e veve di fâ, la nâf e tornà indaûr fin tal puart di indulà che e jere partide. Cussì il lama e l’alpaca a poderin tornâ di buride inte lôr cjalde e comode chebe dal zoo di Lignan. ❚