Cuarantenûf agns di Glesie Furlane

Domenie ai 27 di Avost passâts, il grup di Glesie Furlane si è cjatât te antighe e venerande glesie de mont di San Pieri in Cjargne par comemorâ, tai cuarantenûf agns, la date dai 28 di Avost dal 1974. In chê dì e in chel an, une desene di predis, fate la propueste – no acetade dai doi vescui presints – di celebrâ messe par furlan, a metevin sul altâr il document “Predis cjargnei pal lôr popul” e a bandonavin il templi devant di une cincuantine di predis che a varessin celebrade messe par latin. Un at unic, fûr di ogni imagjinazion, di no crodi e plui grant des lôr fuarcis, ma che al veve la fonde tal vanzeli di Zuan: Lis pioris i van daûr al pastôr parcè che a cognossin la sô vôs. Ma no van daûr di un forest, anzit i scjampin, parcè che no cognossin la vôs dal forest. (cfr. Zn 10, 3-5).
◆ Il fat dal dut provocatori al à segnât l’inizi uficiâl de identitât di GF e in chel vanzeli al jere motivât il spirt che le varès vuidade e tignude sù intai agns.
◆ Al è chest, il motîf dal incuintri dal grup te ultime domenie di Avost di ogni an te plêf di San Pieri in Cjargne.
◆ Chest an no jeri presint e cussì tal cidin de mê stanzie e de sere mi soi lassât cjapâ dai ricuarts: incuintris, ritîrs spirituâi, documents, pôris e gloriis, e soredut lis tantis oris passadis insiemi li che no mancjavin mai un gustâ saurît di riflessions, di cjantosis, di ridi, di vite e di decisions sul cemût continuâ il nestri scombati.
◆ Ognun al à dirit di dâ une sô valutazion sul operât di GF; un fat però al è sigûr: par noaltris nol è stât un timp vueit, cence un sens, pierdût te monotonie di ogni dì, e o podìn dî che in dut, a favôr o cuintri, ur vin volût ben a cheste nestre glesie e popul.
◆ Chest nus è suficient e nus baste.
E di memorie in memorie, di sium in sium, mi soi cjatât tal nestri Friûl di cumò.
◆ In zornade di vuê, il popul furlan e la nestre glesie a stan passant une situazion che mai e mai altri e je stade tant in bas: la mancjance di une identitât furlane cussiente e vive e il bandon de religjon cu lis glesiis simpri plui desertis; pape Francesc al podarès ripeti ancje pal Friûl: “Fratelli e sorelle, non siamo nella cristianità, non più!”.
Cjacarant de identitât e de lenghe furlane o slovene o todescje, o podìn dî cence pôre di falâ che in tancj agns la istituzion diocesane no à mai cjapât di pet la cuistion. E di cussientizazion e formazion su la nestre origjinalitât antropologjiche, culturâl, eclesiâl: nancje di nomenâ! E à dade une man cuant che e scugnive, ma e je restade simpri trivenite, romane, glesie taliane. O soi dacuardi cun chel predi che mi diseve: “A àn remât plui cuintri di noaltris che a favôr”.
◆ Vuê la situazion e je tant grivie che a valin pai Furlans lis peraulis dal libri dal profete Denêl:
In chest moment no vin ni princip, ni profete, ni sorestant (Denêl 3, 38).
E je, nude e crude, la nestre realtât.
◆ Sul grup di GF a restin, tai predis e te int, ancjemò tancj prejudizis. O pensi che la plui part dal clericât nus cjali ore presint cun suspiet e nus eticheti: “Chei dal furlan: robe superade”. O soi ancje convint che la plui part dai predis a vedin let ben pôc de grande produzion di scrits di pre Antoni Beline. A varan dade une cjalade a La fabriche dai predis, par curiositât e par ridi, e a lis Olmis che a vignivin publicadis su la Vite Catoliche.
◆ Pre Antoni al reste ancjemò un predi scomut, no conformi e di lassâ di bande cui siei libris.
◆ Cjalant chescj cuarantenûf agns passâts, tant al è stât semenât pal ben dal nestri popul e glesie ma pal moment la semence e polse sot tiere.
◆ La storie no cor mai suntune ferade drete, e ogni tant di bot e sclop e fâs bruts o biei scherçs. Il Friûl al è te glacere dal Invier ma pues stâi che une dì al svinti l’aiarin de Vierte e che la semence fraidessude e meni tun zermoiâ bondant.
◆ O sin fîs de rusticitas de glesie di Aquilee, dal mont contadin di une volte cun ducj i siei mîts che la agriculture industriâl di vuê pal moment no rive o no vûl capî. I nestris paris a vevin pazience e fiducie sedi tal biel che tal brut des stagjons, savint però che la stagjon dal nuie no je mai esistude.
In cheste sperance e sapience o vin di lâ indenant a scombati pal ben dal nestri popul e glesie. ❚