“Il concors leterari “Vôs de Basse”, inviât intal Setembar dal 2017, cualchi mês daspò de metude in vore dal Sportel associât pe lenghe furlane dai Comuns di Cjarlins, Gonârs, Muçane, Porpêt, Prissinins e San Zorç di Noiâr, al è nassût cun chê di meti in pîts une ativitât comune che e des vôs aes realtâts dal puest”.
E chest volumut di un centenâr di pagjinis al met dongje dutis lis poesiis e lis contis premiadis o segnaladis intes primis trê edizions, in ognidune des trê sezions: narative, poesie e students.
◆ Lis premiazions si davuelzin ogni sierade inte vile Dora di S. Zorç cu la regjie di Serena Fogolini che e je ancje la curadore di chest librut. Cui che al à cjapât part a une di chestis seradis (che a deventin spetacui, parcè che Serena e je ancje atore e ‘show woman’) al à benzà sintudis chestis poesiis e contis. Ma leilis al da une altre emozion. Massime lis contis: cualchidune e je propit une piçule perle, scrite intune lenghe sclete che e cor vie ferbinte. E che no si ferme dome a cjalâ il mont tradizionâl, il Friûl di une volte. Che al è ancje presint (la delicade storie di amôr Dibant), la frute che e incrose Pasolini (Une storie piçule), ma che si slargje a cjalâ indentri intes robis di cumò: l’amiant che al cope (Torse Sand Creek), lis malatiis che a puartin vie zovenuts (La fondazion), il frut svampît che ducj i ridin daûr (Pauli Brustul), i baracons che a robin tant puest che no si rive plui a parcâ (_une catabasi), la droghe e i rapuarts dificii jenfri mari e fie (Il polpeton). Insome, un Friûl che no si contente plui di une rapresentazion folcloristiche e stantice.
◆ I autôrs a son jenfri i nons plui significatîfs de prose furlane in dì di vuê: Gianfranco Pellegrini, Gianluca Franco, Raffaele Serafini, Astrid Virili e v.i. E al va dit che la salût di une lenghe si misurile plui su la prose che no su la poesie.
◆ A completin il libri trê scrits de assessore ae culture di S. Zorç e dai presidents de Filologjiche e de Cooperative di informazion furlane. Pre Zaneto, Gina Marpillero, Alviero Negro, Tite Marzuttini, Luciano Morandini, Pierluigi Visintin (che il concors ur è intitulât) a puedin stâ contents!
◆ Al è di sperâ che il concors al vadi indevant (par chest an e je za inmaneade la seste edizion) e che si tornin a racuei in volumuts lis contis plui bielis. ❚
