Ogni abitant al consume 212 litris di aghe in dì e il 71,5% al è preocupât pai cambiaments climatics
La emergjence idriche e je dome cjacaris. E no di vuê. Lu dimostre ancjemò une volte il report che l’Istat al à dât fûr, come il solit, ai 22 di Març passâts, Zornade mondiâl de aghe. Il dât che al colpìs subit al è chel su lis pierditis idrichis des rêts di distribuzion, che par chês, apont, tant si fevele e pôc si fâs. Se intal 1999 lis pierditis a jerin, in medie, dal 32,6%, intal 2020 a son ladis sù fintremai al 42,2%. La regjon piês e je la Basilicade, cun pierditis dal 62,1% e chê plui virtuose e je la Val di Aoste cun dome il 23,9%. Il Friûl-VJ si loghe dongje de medie taliane cuntun 42,0% di pierditis. “La cuantitât di aghe dispierdude in rêt e continue a rapresentâ un volum grant, che si pues cuantificâ in 157 litris in dì par abitant – al scrîf l’Istat –. Stimant un consum pro capite come la medie nazionâl, il volum di aghe dispierdût intal 2020 al sodisfarès lis esigjencis idrichis di plui di 43 milions di personis par dut un an».
Italie ancjemò la prime, in Europe, intai prelêfs par ûs potabil
Il volum di aghe par ûs potabil gjavât par ûs domestics, publics, comerciâi, artesanâi, industriâi e agricui che a jentrin inte rêt comunâl al è di 9,19 miliarts di metris cubis intal 2020. Il prelêf zornalîr di 25,1 milions di metris cubis, di 422 litris par abitant, al è rindût pussibil di une rêt capilâr di provision. Cundut de riduzion dal 0,4% a pet dal 2018 – che al puarte indevant la contrazion modeste dai volums gjavâts za rilevade intal censiment precedent – la Italie si conferme, aromai di plui di un venteni, tal prin puest tra i Paîs Ue pe cuantitât, in valôr assolût, di aghe dolce gjavade in complès par ûs potabil di cuarps idrics superficiâi o soteranis. In tiermins pro capite, la Italie (155 metris cubis anuâi par abitant) si loghe in seconde posizion, precedude dome de Grecie (158) e cun daûr, a distance nete, la Bulgarie. Il plui grant prelêf di aghe par ûs potabil al è intal distret idrografic dal Flum Po: 2,80 miliarts di metris cubis, o ben il 30,5% dal totâl talian. Tra lis regjons, in Lombardie si gjave il plui grant volum di aghe par ûs potabil (1,44 miliarts di m³; 15,6% dal totâl talian), intant che la Val di Aoste e à il consum plui alt par persone: 438 litris in dì. I plui virtuôs a son i puliês, cun 155 litris a persone. Il Friûl-VJ, al sta sù par jù tal mieç, cuntun consum zornalîr pro capite di 212 litris di aghe.
Cambiaments climatics e aghe minerâl
Intant, al dîs ancjemò l’Istat, il 39,5% dai abitants dal Friûl-VJ al è une vore preocupât pal intosseament des aghis, percentuâl che e va sù al 71,5% cuant che si fevele di efiet sidrere o di cambiaments climatics. In compens, plui dal 94% dai utents a son sodisfats pal servizi idric ufiert dai gjestôrs regjonâi, ancje se il 12,4% no si fide a bevi la aghe de spine (29,4% in Italie). Cussì, il 75% dai abitâts dal Friûl-VJ al declare di bevi almancul mieç litri di aghe minerâl in dì.
◆ Infin, no si pues no rimarcâ che in Italie, intal 2021, a son stadis adotadis misuris di razionament de aghe in 15 Comuns capitâl di provincie (a jerin 9 intal 2019, e 11 intal 2020) e, nol sucedeve dal 2010, un ancje inte aree setentrionâl dal Paîs, o ben Verone. ❚
