Bant istruzion pai progjets des scuelis publichis e paritariis

Ancje pal 2023 la Fondazione Friuli, adun cun Intesa Sanpaolo, e torne a confermâ la poie ae istruzion cul bant che al è stât presentât in Març te sede di Confindustria Alto Adriatico, a Pordenon. Si trate di une disponibilitât di 600 mil euros pes scuelis publichis e paritariis des ex provinciis di Udin e Pordenon par inviâ progjets dilunc dal an scolastic 2023-2024. Il bant al vûl contribuî al disvilup di ativitâts formativis dedicadis ai students, cul obietîf di miorâ l’aprendiment des competencis di base e di chês trasversâls. Si vûl promovi azions che a favorissin il potenziament de ativitât didatiche e la sperimentazion di modei formatîfs inovatîfs, ma ancje supuartâ la riprese di un contest di relazions che a son stadis metudis in crisi di doi agns di pandemie. «O vûl ringraciâ la Regjon par vie che nus da la pussibilitât di colaborâ intun setôr strategjic, e Intesa Sanpaolo pe costance tal sostignî cheste iniziative – al à dit il president de Fondazione Giuseppe Morandini – . Chest gnûf bant si poie su cuatri pilastris. Il prin al intint finanziâ la organizazion dai doposcuele, cun chê di sostignî i gjenitôrs tes diviersis fasis di cressite dai lôr fîs. Il secont al inten i percors di benstâ di grup, par fâi cuintri aes consecuencis dal distanziament sociâl intant de pandemie e par recuperâ il valôr des relazions. Il tierç pilastri al supuarte lis esperiencis tal forest par infuartî lis competencis linguistichis. Il cuart al è destinât aes scuelis pe infanzie, par meti in pîts e par furnî spazis ludics e motoris, in particolâr in chês struturis che no àn la palestre». «Il disvilup di un teritori si fâs tacant de valorizazion dai zovins, gjavant i ostacui che a limitin di fat l’acès ae istruzion, e invistint par valorizâ talents, atitudins e inclinazions – e à dit la assessore regjonâl pe formazion Alessia Rosolen –. Ta cheste direzion si môf il bant de Fondazione Friuli, inte suaze dai percors individuâts de aministrazion regjonâl che in chescj agns e je intervignude cun azions impuartantis par garantî il dirit ae istruzion, infuartint dut il setôr scuele e insiorant la ufierte pai students cun esperiencis formativis tal forest». «La iniziative di Fondazione Friuli – al è intervignût Michelangelo Agrusti, president di Confindustrie Alto Adriatico – e va a insiorâ la propueste formative là che o sin impegnâts di diviers agns: cul sisteme dai Its, e ufrìs formazion di ecelence post diplome tal cjamp de informatiche, prime in Italie, dal digjitâl, de logjistiche, dal len e mobilie, e dal medicâl, cuntun tas di ocupabilitât – dentri di doi mês de fin dal cicli scolastic – di plui dal 80 par cent. Il nestri obietîf al è chel di lâ indenant a invistî te valorizazion de formazion tecniche ancje in istitûts dulà che a studiin une vore di gnûfs talians che, midiant de istruzion, a acuisissin la citadinance sostanziâl». «O sin contents – e à dit Francesca Nieddu – di sostignî ancje chest an Fondazione Friuli e o condividìn l’impegn pes gnovis gjenerazions e la volontât di continuâ a meti in vore iniziativis che a judin a contrastâ lis disavualancis, il disasi e l’isolament. O larìn dilunc a supuartâ i fantats e lis lôr fameis tal percors scolastic, cun soluzions smiradis e imprescj concrets, parcè che par nô la scuele e je un imprest fondamentâl pal futûr des gnovis gjenerazions e pal disvilup di competencis e professionalitâts indispensabilis pe cressite dal paîs». ❚