Ae fin di Mai, sul sierâsi dal mandât, il guvier sloven vuidât di Janez Janša al à decidût a pro de fin de validitât dal decret su lis misuris temporaniis par prevignî e par contignî la difusion dal Covid-19.
◆ La fin de validitât dal decret si puarte daûr ancje chê di dutis lis misuris fatis buinis par contignî e prevignî la pandemie di Covid-19. Lis ultimis restadis a jerin l’oblic di puartâ une mascarute tes ativitâts sanitaris e di assistence sociâl.
◆ La propueste di gjavâ lis misuris e je rivade ai 25 di Mai di bande dal grup di esperts pal Covid-19, vuidât de infetivolighe Mateja Logar. Par prevignî e par contignî lis infezions di Covid-19, il grup al à conseât di tignî buinis lis racomandazions dal Istitût nazionâl di sanitât publiche (Nacionalni inštitut za javno zdravje).
◆ Cussì, di ca indenant a saran i singui ospedâi slovens – ven a stâi i lôr Servizis di prevenzion e contigniment des infezions ospedalieris – a decidi se al sarà obligatori puartâ mascarutis.
◆ Cun chê che la situazion de pandemie e va in miôr, il grup di esperts al à constatât che nol à plui sens lâ indenant a esisti. Cussì, simpri ae fin di Mai, il ministeri de sanitât de Republiche di Slovenie al à sotscrit l’at pe fin de sô ativitât. Intant si volarès lâ indenant a promovi la vacinazion.
◆ Domenie ai 29 di Mai, denant di 384 test molecolârs e 1350 antigjenics rapits, in Slovenie a vevin regjistrât 60 infezions di Covid-19. In totâl, i pazients ricoverâts cun infezion confermade a jerin 69, e chest numar al cjapave dentri sedi i ricoverâts par Covid-19 che chei che no vevin dome cheste malatie. Tai reparts di terapie intensive i pazients cun positivitât confermade a jerin in totâl cinc. Tra i 27 e i 29 di Mai i pazients muarts par Covid a jerin trê. ❚
Vie lis ultimis misuris, nancje il grup di esperts pal Covid-19 nol covente plui
Luciano Lister
