LA INTERVISTE. Vignâi: lis autoritâts sotanis e la resistence dai coltivadôrs

La storie vitivinicole dal Friûl e risint di dôs influencis: la contee di Gradiscje e Gurize, sot dal imperadôr da la Austrie che za tal 1787 e veve cirût di meti ordin cul catast intai vignâi, catalogâts pe cualitât. Di che altre la Serenissime cun dutis lis influencis francesis (baste pensâ al libri di Lodovico Bertoli dal 1747 intitulât “Le vigne e il vino di Borgogna in Friuli”). Lis numerosis varietâts autoctonis furlanis a vegnin consideradis di pôc valôr e pocjis a vegnin conseadis ai coltivadôrs. Al IV Congres enologjc austriac, Giovanni Bolle al consee di sielzi tra i blancs Sauvignon, Pinot blanc e Grîs, invezit tra i ros si consee Cabernet Sauvignon Franc e Pinot, ma i furlans a sielzin ancje Merlot e Chardonnay che dal Cuei di Gurize si slargje dopo in dut il Friûl. Lis resons di marcjât a stan parsore di chês de identitât e de cualitât dal prodot dal territori.
Ae fin dal ’800, cu lis malatiis che a vignivin de Americhe, peronospore e foncs che a tachin i raps e fueis e filossare che e ruvine lis lidrîs, si scree un brut moment di crisi pe viticulture furlane. No jude la Vuere dal ’15-18 che e puarte distruzion, dams e abandon. Dal moment che no jere disponibile une classificazion des cualitâs plantadis, il dam al è incalcolabil.
RICOSTRUZION_Cuant che e partìs la ricostruzion dai vignâi si cîr di doprâ cualitâts cun buine produzion e resistence a lis malatiis. Tal 1921 a Udin si organize une cunvigne par denomenâ lis varietâts degnis di jessi riplantadis e cualis eliminadis. Tal 1939 Pignul, Tazzelenghe e Sclopetin a son cuasi sparîts, come che al scrîf Guido Poggi tal so inomenât “Atlante ampelografico”. Poggi al proponeve di slargjâ la difusion di Ribuele, Verduç, Picolit, Cividin, Tocai, Ucelut, Refosc, Pignul e Sclopetin.
BATAIS_Un esempli al è il comun di Prepot che, cun dut il Consei comunâl, al à simpri cirût di difindi il so vin (Sclopetin). Cussì a faserin altris produtôrs, cun tante fature, intimidazions e cuintri la ostilitât di tancj altris produtôrs e cuintri i regolaments burocratics (viôt ancje il câs dal premi Risit d’Aur che si fevele te interviste ae Nonino, ndr). Si invie cussì une bataie par riabilitâ chestis produzions, otignint un sucès ai 8 di Març dal 1978 cul Regolament CEE 486: si tornin a nomenâ cualitâts che a somein pierdudis. Ma cheste no je dome une storie passade: Bruxelles, tal trieni 2009-2011, al proviôt un miliart di euro par cui che al gjave fûr vignâi, parcè che la produzion e je masse alte. In Italie si varessin di gjavâ 58.435 etars. E cui someial che a ‘nt paiarâ lis conseguencis? I vignâi plui dificii di coltivâ e chei in montagne, po! Che si tornin a començâ lis batais…
Mara Piccoli