ATUALITÂT. I tumui in Friûl

O podìn aromai definîle une peculiaritât de nestre regjon, un patrimoni archeologjic che no si cjate facilmentri ator pe Italie, ma che invezit e je ben inlidrisâde intal nestri teritori.
O fevelìn de culture dai cjastelîrs e dai tumui funeraris, une realtât che e je stade studiade pe prime volte cun criteri dal grup protostoric de Universitât dal Friûl, vuidât de prof.e Paola Cassola Guida cul jutori de prof.e Elisabetta Borgna e la dot.e Susi Corazza.
I studis a son tacâts za cualchi an indaûr, intal 1997, scomençant cui cjastelîrs, e in particolâr su chel di Varian (“Il cjastelîr di Varian. Lis ativitâts e i spazis cjasalins intun vilaç di 3000 agns indaûr”,Vuide ae mostre, Basilian 2003, par cure di Paola Cassola Guida e Susi Corazza) o ben insediaments de ete dal Bronç (tor i 1500 agns p.d.C.) sparniçâts ator pal Friûl. La particolaritât di chescj insediaments e je che a son posizionâts gjeneralmentri su piçulis alturis, dispès dongje di cors di aghe, recintâts artificialmentri cun rialçs di tiere, i sgjâfs a àn puartât in lûs li sfondis des barachis abitativis (busis di pâl), scarics di materiâi (o podaressin definîlis piçulis discjariis), olmis di brusât e cualchi frament di materiâl ceramic o in bronç. I abitants di chescj insediaments no son ancjemò stâts individuâts cun clarece, ma si pense che a fossin popolazions pre-indoeuropeanis che a vignivin di zonis maritimis e che si sedin insediadis inte zone de Istrie e Dalmazie par prin, po dopo che a sedin rivadis ancje intai nestris teritoris. Chescj a vivevin di pastorizie e agricolture, duncje a jerin popolazions za ben stanziadis intun lûc.
In concomitance ai cjastelîrs si è svilupade ancje la usance funerarie dai tumui, o ben chescj imponents monuments che si viodin ogni tant ator pe campagne (agns indaûr forsit a ‘nd jerin tancj di plui, ma il disvilup edilizi di sigûr al à scancelât par simpri chestis testemoneancis). Si sa che i tumui a son stâts doprâts za inte ete de Piere un pôc in dute Europe (baste pensâ ai tumui miceneis, a chei etruscs, altris ancje in Macedonie, intes isulis britanichis, in Ongjerie, in Scandinavie e ancje in Asie), e a jerin un mût di dâ une degne sepulture a personaçs une vore impuartants de comunitât, e dal sigûr chescj lûcs a deventavin ancje ponts di agregazion pe celebrazion dai rîts e pal cult dai antenâts.
Us metìn a chi sot la cjartute (gjavade fûr dal sît dal Dipartiment di Storie e Tutele dai bens culturâi de Universitât dal Friûl) cu lis localizazions dai tumui in Friûl.
Venusia Dominici