SPECIÂL. Pal imperadôr, sopis

Napoleon Bonaparte si fermà in Friûl in trê ocasions: combatint cuintri i Austriacs, tra il mês di Març e il mês di Mai dal 1797, po tra Avost e Otubar pes tratativis che a puartarin al “Tratât di Campoformio”, firmât a Vile Manin di Passarian, e la ultime volte dai 9 ai 12 Dicembar dal 1807, par visitâ lis fortificazions di Palme e di Osôf.
Simpri impegnât in facendis elevadis, dispès gnervôs, Napoleon al dedicave pôc timp ai plasês de taule e in diviersis memoriis de epoche si conte che cualchi volte al dismontàs dal cjaval par cerçâ cualchi sedonade de sope che i soldâts a cusinavin tai lôr incjampaments.
La sope, “soupe” par francês, element fondamentâl de mangjative, e jere in chê epoche une sope penze di cjar e di liùms che i zontavin e i disfavin dentri pan sfruçonât: “Par ogni om al covente un litri di aghe e 250 grams di cjar che si fâs boli a fûc vîf e che si sbrume tal stes timp; zontâ sâl e liùms di stagjon, lassâ cuei e meti il pan te sope al ultin moment!”.
Il regolament militâr al prescriveve che la cjar e ves di cuei par sîs oris intune pignate cu la aghe: provait a fâlu e si disfarà dal dut, dant la consistence juste ae sope.
Une altre sope che ur plaseve une vore ai francês, e jere za chê volte la sope di cevolis e Napoleon stes une dì al pronuncià chestis peraulis: “Un poleç! Sope di cevolis e di patatis, ve dut ce che i covente a un soldât”.
No je tante la influence che i francês a verin su la cusine furlane, za in chê volte une vore puare, ma une e je sigure. I transalpins a odeavin la polente e il pan neri, di fat a contribuirin a introdusi il pan blanc. Ancje se al jere plui costôs, i fornârs a forin obleâts a vêlu simpri, stant che ai invasôrs ur plaseve dome chel.
L’Imperadôr nol jere un grant bevidôr, ma ai siei soldâts invezit ur plaseve il vin, massime chel furlan. Pierre Robinaux, soldât francês, al rimarcà cun plasê che in Friûl “la planure e je une vore fertile, a son une vore di vîts; il vin al è ecelent, dut vin ros”, e ancje il trombetîr Jacques Chevillet si visà des “vilis sioris pe fertilitât dal teritori, massime di bon vin”.
Paolo Foramitti