ATUALITÂT – Cine: la prime volte di une mostre za siore

Si è davuelte dai 25 ai 28 di Novembar a Udin al cine Visonario, la prime edizion da La Mostre dal Cine – Festival dal Cine European des Lenghis Mancul Pandudis. Un apontament che in realtât nol è cence storie,  par vie che si pues definîle la evoluzion de Mostre dal cine Furlan che si jere tignude za dal 1988 in ca. In chest câs, la manifestazion e à volût cressi a nivel european, metint adun dutis lis lenghis des nazions cence stât, ven a stâi Galizie, Paîs Bascs, Catalogne, Ocitanie, Bretagne, Gales e naturalmentri Friûl. Un cuc sul cine che al fevele la sô lenghe; di fat, tes proiezions – a son stadis proietadis 24 peliculis, dutis a gratis – si è lassade la lenghe origjinâl, i sottitui par furlan e par inglês: il locâl e il globâl, si podarès dî. La volontât dal Cec (Centri Espressions Cinematografichis di Udin) e je stade chê di valorizâ la art dal cine che e rapresente la realtât intes lenghis minorizadis, cuntun voli suntun mont par fuarce diferent.
PONT DI RIFERIMENT_ «I regjiscj e i produtôrs presints ae prime edizion de Mostre dal cine a àn esprimût il lôr entusiasim pe iniziative, viodintle tant che une ocasion straordenarie par stabilî un rapuart continuatîf tra autôrs e realtâts produtivis e distributivis» al à vût dit l’organizadôr Fabian Ros. «I ospits a àn decidût, duncje, che la Mostre dal cine di Udin e deventi un pont di riferiment permanent tra chestis cinematografiis europeanis, di mût di meti in pîts un coordenament».
I INCUINTRIS_ No dome cine tal festival, duncje, ma ancje incuintris cui autôrs e regjiscj des tantis peliculis. In particolâr: Ignacio Vilar, regjist dal film galizian Pradolongo e Marina Fariñas, produtore dal stes film; Carla Subirana, regjiste catalane autore dal documentari Nedar; Telmo Esnal, regjist basc coautôr de comedie Aupa Etxebeste!; Alberto Gorritiberea, regjist basc autôr di Eutsi!; Alfonso Camarero, regjist galizian autôr dal curtmetraç A Xinecóloga; Roland Pécout, scritôr ocitan senegjatôr e protagonist dal documentari TransOccitan di Eric Eratostène; Fredo Valla, regjist ancje lui ocitan, un dai protagoniscj dal documentari TransOccitan; Soazig Daniellou, regjist breton, autôr di O seizh posupl e dal curt Anicet Furic e, par finî, Rhys Powys, regjist galês autôr dal film Ryan a Ronnie.
TILIMENT PROTAGONIST_ Pal  Friûl al è stât protagonist Rumore Bianco, il film di Alberto Fasulo sul nestri grant flum, il Tiliment. Se il Friûl al à podût ospitâ tancj tocuts di une Europe dai piçui popui, e je stade ancje la ocasion pal Friûl stes di mostrâsi ae Europe: un scambi che al fâs ducj pui siôrs, tant di rivâ a sintîsi une ricjece e no fruçons.
Mauro Della Schiava