Sfuei Mensîl Furlan Indipendent
Archivi de Patrie

Polemichis pes “vignetis” in Slovenie

Alessio Potocco

Il belanç dal gnûf metodi di paiament pes autostradis al vignarà fat ae fin de Istât stant che, come che al à dit il prin ministri Janša, si trate di une soluzion provisorie in spiete de introduzion dal sisteme satelitâr di paiament tal 2010. Difat, dal prin di Lui, par cui che – Slovens e forescj – al vûl lâ in machine su lis autostradis e lis superstradis de Slovenie al scuen comprâ une “vinjeta” (“vignete”), cemût che, par esempli, bisugne fâ in Austrie. La diference e sta te durade e tal cost dal bolin di tacâ sul veri des machinis (oben dai veicui fin a 3,5 toneladis di pês): lis opzions a son dome dôs, o semestrâl (35 euros) o anuâl (55 euros – in vendite dome dal an che al ven). Pes motocicletis invecit il bolin di sîs mês al ven 17 euros e mieç, chel di un an 27 e mieç. Cu la vignete no si à plui di fermâsi al casel par paiâ, come che invezit a àn ancjemò di fâ i camions. E nol vâl la pene riscjâ: la polizie
e je cence dûl, lis multis a van di 300 a 800 euros.
Lis polemichis a son vignudis fûr tacant de fin dal mês di Avrîl, cuant che il parlament di Lubiane al fasè buine la leç che e proviôt lis vignetis. La maiorance di centri-drete, cul ministri dai Traspuarts Radovan Zerjav, no je stade a scoltâ la oposizion che e veve dubis sei su la durade dai bolins che sui coscj; par esempli, il Partît liberâl-democratic al veve proponût di zontâ ancje lis vignetis di dîs dîs da 10 euros e chês di un mês da 20 euros.
Une vore critic ancje il president dal Friûl-Vignesie Julie. Secont Renzo Tondo, il fat di vê introdusût dome dôs sortis di bolins nol è stât un bon servizi a pro dai citadins e al va cuintri dal spirt de Euroregjon. Simpri secont il president de Regjon, prime di fâ sieltis come cheste si varès di discuti cui guviernants dai teritoris vicins. Dacuardi cun Tondo ancje il president de Provincie di Gurize Enrico Gherghetta, che al à pandût il timôr che la decision slovene e podi lâ cuintri dal svilup economic dal Friûl orientâl.
Ancje la Comission europeane, cul ex comissari european pai Traspuarts Barrot (al so puest cumò al è il talian Tajani), e à domandât sclariments in vie uficiâl ae Slovenie: si ben che a nivel comunitari no esistedi une norme rivuart al paiament des autostradis, secont Bruxelles vê dome dôs categoriis di vignetis al va a favôr di chei che a doprin dispès la machine e invezit al va cuintri, par esempli, dai turiscj che a vegnin intal paîs dome par cualchi dì o adiriture lu traviersin par lâ in Cravuazie, Italie, Austrie o Ongjarie. Cun di plui, tai mês passâts no son mancjadis lis reazions di diviers Automobil club europeans. L’Adac todesc, cui siei 15 milions di socis, al à bielzà scrit al ministri Zerjav invidant Lubiane a tignî cont de possibilitât di vê vignetis mensîls. Stesse preocupazion pai austriacs dal Amtc, che a àn ricuardât che, in ocasion dal tacâ dal sisteme dai bolins in Austrie tal 1996, la Comission europeane e sbruntà Viene di mût che a fossin proviodudis ancje vignetis di un mês e di une setemane propit par vignî incuintri ai turiscj. Difat, in Austrie si cjatin ancje bolins di dîs dîs che a costin 7,70 euros.
A ingredeâ i za dificii rapuarts jenfri Slovenie e Cravuazie e mancjave dome la cuestion des vignetis. Zagabrie e à protestât a fuart par pôre che cheste Istât tancj turiscj a decidedin di cjapâ une altre strade e di no vignî a passâ lis feriis su lis cuestis de Istrie e de Dalmazie: pôre justificade viodût che il turisim al rapresente plui dal 18% dal Prodot interni a sporc dal paîs. Di bande sô, il guvier Sanader al à conseât a Lubiane di meti in vendite ancje vignetis di une setemane o dîs dîs a pro dai turiscj. Il ministri dal Turisim cravuat Bajs al à ricuardât che almancul doi tierçs dai turiscj che a van in Cravuazie a passin pe Slovenie; si calcole che tal 2007 a àn traviersât i valics slovens-cravuats uns 32 milions di lôr. Bajs al à chê di conseâ ai turiscj forescj di cjapâ altris stradis, cence scugnî comprâ il bolin.

__________________________________________

Plui di mil ponts vendite in Slovenie
La vendite des vignetis par menâ la machine su lis autostradis slovenis e je tacade ai 17 di Jugn. Stant al ministri dai Traspuarts Zerjav, il gnûf sisteme al permet di eliminâ il trafic e lis codis ai casei su lis autostradis. Dut câs i casei a son ancjemò, e bisugne stâ atents a traviersâju a no plui di 40 chilometris par ore: lis struturis a vignaran eliminadis dentri de prossime Sierade.
In dute la Slovenie i ponts vendite pai bolins a son plui di mil: ducj i distributôrs di carburant de Petrol e de Omv, i uficis de Kompas, i uficis de Pueste, lis ediculis, i stes casei autostradâi. Lis vignetis si puedin comprâ ancje in Friûl, par esempli a Cormons, Gradiscje, Pieris e Gurize. La Dars (Družba za avtoceste v Republiki Sloveniji – Societât pes autostradis te Republiche di Slovenie) e fâs calcul di vendi chest an plui di trê milions di bolins. Pal 2009 si proviôt di vendi 3,3 milions: 800 mil di chei anuâi e 2,5 milions di chei semestrâi, par un util di 20 milions di euros.
Par savêndi di plui lait sul sît internet (par sloven e inglês): www.cestnina.si/?id=19766〈=1.
Doi slovens su trê a favôr
E i Slovens ce pensino des vignetis? Al pâr che ur plasin, stant a un scandai dal plui impuartant cuotidian sloven, il Delo, che ae metât dal Jugn stât al à svicinât uns cincent di lôr par domandâur une opinion par chel cont. Poben: doi intervistâts su trê a son d’acuardi cul sisteme des vignetis. Rispiet al mês di Març, cuant che il guvier al palesà il so progjet di leç, il numar dai favorevui al è cressût, ancje se di pôc. Dome il 12% al à rispuindût che no à chê di comprâ il bolin, e che al varès doprât stradis secondariis. In plui, metât de int e crôt che cul gnûf sisteme si puedi sparagnâ, mintri chê altre metât e pense che e scuen paiâ di plui. E sarès ore di tornâ a fâ un scandai compagn par savê ce che a pensin i Slovens in dì di vuê.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +