L’EDITORIÂL – Un mandi

Cun chest numar us anunci che o doi lis dimission de incarghe di diretôr de Patrie, cjapade sù daspò de muart di pre Toni Beline.
Pal gno caratar jo mi ‘nt sarès lât in ponte di pîts cence nancje bacilâ a scrivi dôs riis, par no fâus pierdi timp. Però cualchi vecjo furlanist di resint mi à insegnât che al è simpri miôr precisâ e scrivi in chescj câs, parcè che se no si jevin vôs che ti inventin sù di dut.
Par spiegâus la motivazion o ai di lâ indaûr a chê sere dulà che si sin cjatâts pre Toni, il nestri aministradôr Zuan Pieri Biasat, Christian Romanini e jo, li che jo e Christian o jerin lâts par dâ la nestre disponibilitât par colaborâ intun moment di passaç par «La Patrie dal Friûl». Il fat di cjatâsi a jessi nô cuatri mi fasè capî che si veve cjapâsi sù dute la cjame di un compit impuartant, faturôs, ma une vore stimolant e si sin butâts in plen te imprese. Tant in plen che al inizi pre Toni si preocupave di trop che i lavoravin parsore, contenton,
ma domandantnus cu la sô solite ironie «jo o soi vedran, ma voaltris no vêso une morose che us dîs alc?»
Fin di chel moment jo o vevi za decidût che par doi agns mi sarès dedicât a cirî di fâ sù un progjet di riviste daûr di chel che o pensavi jo che al fos il miôr e che, une volte completât, al podès lâ indevant bessôl,
passant la man. Po dopo al è sucedût ce che al è sucedût: pre Toni nus à lassâts e alore mi soi cjapade sù la cjame ancje de direzion, lant indevant un an di plui di ce che mi jeri imprometût. Zuan Pieri Biasat al jere za stât visât fin dal inizi di chest an de decision che us fâs savê cumò, e i fiers in aghe pal passaç a son bielzà stâts metûts in vore. Jo pal moment o fâs un pas indaûr metintmi a complete disposizion di cui che al vignarà. Cheste a nivel professionâl par me e je une altre sfide: se il lavôr fat fin cumò al è valit, il biel grup che si è creât si mantignarà, mantignint compagne (o magari miôr) la cualitât dal progjet, che mi pâr che al è plasût. La pussibilitât di cjalâ lis robis un tic “di fûr” no jessint impegnât cu lis sieraduris dal gjornâl e la gjestion cuotidiane o pensi che mi permetarà di dâ inmò une biele man ae Patrie, in acuardi – o disevi – cul sucessôr, che al cjatarà la mê plene disponibilitât par cualsisedi dibisugne.
Par sierâ, o ringrazii di cûr (ma une vorone!) ducj chei che a àn colaborât al progjet in chescj agns, metintsi a disposizion la plui part in maniere gratuite e par une passion comun: chê dal Friûl. Stant che achì al è impussibil nominâ ducj (par fortune: al vûl dî che a son tancj), o spint dôs peraulis par ringraziâ Christian Romanini che mi è stât simpri dongje a fâ e a suportâmi e che cun lui o ai lavorât benon e in plene sintonie.
O vin cirût di fat, di pandi une idee che o vevin in comun: une Patrie vierte a dutis lis personis e a ducj i aspiets dal furlanisim, cence preclusions. Cheste la intenzion, po dopo il judizi se o vin rivât a fâlu, e a fâlu ben (o magari mâl) ur spiete ai letôrs. Chei letôrs che o vin cirût di tignîsi come unics parons, insiemit al pinsîr ai fondadôrs dal gjornâl, Felix Marchi e Josef Marchet, e a lis tantis figuris impuartantis dal furlanisim che nus àn precedût. Parsore di ducj pre Toni che o vin vût la grande fortune di lavorâ insiemit cun lui. Une fortune di un valôr di no podê descrivilu, come l’onôr di jessi stât diretôr dal sfuei che, par me, al è il plui impuartant di ducj tal mont.
Mandi, Dree Venier