Universitât dal Friûl ancjemò par trop?

Par ducj i furlans la Universitât dal Friûl e je stade une concuiste. Nassude daspò dal taramot, par volê de int che e cjapà su passe 100.000 firmis, cul “fin di contribuî al progrès civîl, sociâl e ae rinassite economiche dal Friûl” e je cressude intai agns sedi tal numar di iscrits, sedi te ufierte formative, ma soredut dal pont di viste de cualitât.
Zaromai di cualchi an però l’Ateneu al à di scombati par vie dai finanziaments masse bas. Si stime che la Universitât e sei “sot finanziade” almancul dal 14% di chel che i spietarès e dut chest in dam dai lavoradôrs e dai progjets di ricercje. In chest clime za grivi a rivin in chescj dîs i tais previodûts dal Decret di Leç 112 fat bon dal Consei dai Ministris ae fin di Jugn.
In chescj dîs, intant che o prontìn chest gnûf numar de Patrie, il dibatiment al è une vore vivarôs e, magari cussì no, al zire dut ator ae cuestion “valie la pene di vê dôs Universitâts te nestre regjon?”. Par dî il vêr za cualchi mês indaûr la Assessore regjonâl ae Universitât, Alessia Rosolen, e veve fevelât di doplis te ufierte formative, cuntun riferiment specific al parc tecnologjic e ae ricercje sientifiche.
Plui di cualchidun al fevele di meti adun une Universitât dal Friûl-Vignesie Julie (si viodarà se cu la lineute o mancul), e il pont di partence al pâr jessi la creazion di une Fondazion di dirit privât jenfri i doi Ateneus, la Sissa, i Ents locâi e i privâts che a volaran jentrâi. Il fin al è chel di creâ un font di finanziament unic, e di dâ il vie a une serie di azions condividudis (de didatiche al marketing).
Lis reazions politichis a son difarentis, ancje dentri de stesse maiorance regjonâl. La strade sielte de Zonte e somee clare, ma la Leghe Nord no je par nuie in acuardi cu la ipotesi di creâ une Universitât uniche. Il President de Provincie di Udin, Pietro Fontanini, al è stât une vore clâr pandint la sô contrarietât ancje rispiet ae Fondazion. La strade de gnove Retore Cristiana Compagno e somee dute di rive sù.
La gnove de ultime ore intant che o sin par lâ in stampe e je che lis fondazions «a saran dôs: chê di Udin e chê di Triest», al à vût declarât il President de Regjon Renzo Tondo. Al rientre, insumis, il progjet Rosolen. Tondo al à zontât «che vuê come 30 agns indaûr la competizion tra Udin e Triest e je un valôr zontât, ma chest nol gjave la necessitât di creâ sinergjiis tra lis universitâts».