ATUALITÂT – San Simon a Alberto Luchini

Il premi leterari San Simon pal 2009 lu à vinçût il romanç «Coventave vê pora?» di Alberto Luchini, cun cheste motivazion: «Un pinel cjatât intun supermarket al devente strument di indagjin interiôr: al salte fûr un cuadri dulà che, tal rapuart di un om cu la sô femine, ancje i lûcs comuns a vegnin acetâts intun contest di cuotidianitât mai esaltade ni esecrade, e dulà che il sens dal dut al polse intune inelutabile dissipazion de esistence.»
E je stade ancje segnalade de jurie la opare «Dôs di trê» di Stiefin Gasti.
La jurie, presiedude di Carlo Tolazzi, e veve dentri Franco Marchetta, Mario Turello, Giacomo Vit e Aldo Colonnello.
In confront al mieç disastri dal an passât, li che il premi nol jere nancje stât assegnât, cheste volte a son stadis presentadis 12 oparis: di chestis, pe jurie, uns trê a vevin la dignitât dal romanç.
TIRADIS DI ORELE_ Pôcs dîs dopo, il president de jurie Carlo Tolazzi al a mandât un coment critic al Messaggero su la situazion de narative furlane di vuê. Fra i problemis che al marche: scjarse inventive, pocje abilitât tal davuelziment de trame, slungjâ il brût par rivâ aes 60 cartelis domandadis, etât alte dai partecipants che i sa di naftaline, il «snobâ» la leterature taliane di bande dai autôrs. Conclusion dal resonament: «una volta la legittimità di una parlata a fregiarsi del titolo di lingua si fondava sulla presenza di una grammatica e di un lessico originali, sul numero dei parlanti e sulla produzione letteraria. Oggi pare di no, oggi ci si fa forti solo del numero dei parlanti».
No je la prime volte che la jurie e critiche i lavôrs, anzit: l’an passât Franca Mainardis, in jurie, simpri sul Messaggero e diseve: «Lis contis a son cuasi simpri autobiografichis e riferidis a contescj za sintûts e par nuie origjinâi. Debile e je la forme cun frasis che a çuetin. La grafie no je curade».
Intal 2007, invezit, la jurie e criticave il vincidôr Nardin pal ûs dal passât sempliç che, daûr dal parê de jurie, nol è carateristic de lenghe furlane. Une curiositât: il vincidôr dal 1995 Carlo Tolazzi lu doprà tal so «La salamandrie tal fûc», cussì come Mario Turello, tal so saç «Il Brevet», vincidôr dal San Simon 2001.
Maurizio Biasìs http://ilcrot.blogspot.com/