Cristina Noacco, Faliscjis, storiis di fûc e di fum, Udin, Kappa Vu, 2019

“Tal dopomisdì dal sîs di Zenâr, a Cortâl e in ducj i paîs dal Friûl, bregons di vore e guants di manoâl, si va cui amîs a cjapâ sù fassinis e bedecjis, bielis prontis intai curtîi e staipis intai cjamps, par preparâ il pignarûl de sere. Ridint e scherçant daûr di chei che a lavorin, chei che a cjalin fasint fente, chei che scuasit a colin cul grum a pene poiât par traviers e chei che a sdrondenin il cjâf cence capî parcè che si à di lavorâ tant par dopo brusâ dut… Si fâs scûr e si dai fûc”.
◆ ‘Se tu vuelis sedi universâl, fevele dal to paîs’. Cristine e fas sô cheste massime di Tolstoj. E ponte i voi su Cortâl, frazion di Reane che, in dì di vuê, e à cirche dusinte animis. E piturant il mont di chest paisut e slargje la vision su la umanitât interie cun siei difiets, cu lis sôs debilecis, cu lis sôs contradizions, ma ancje cu lis sôs bielecis.
◆ A rivivin cussì moments de infanzie, ricuarts di int dal paîs, tradizions, peraulis di une volte.
◆ Un frut al spiete la nêf cun mil mans e cuant che e rive al è incantesemât di chel cidin che al involuce il creât, di chê magjie che dome i voi di un frut a san viodi.
◆ Il camping al è une ocasion par scherçs e matetâts, ma ancje par une manifestazion di solidarietât dentri di une comunitât. Matetâts che a saltavin fûr ancje intal carnevâl, cuant che al jere une fieste di popul e no un strafaniç consumistic, come in dì di vuê.
◆ E lis cjariesis? Cui podaraie meti in dubi che lis cjariesis robadis e mangjadis sul arbul a àn un savôr che al sa di mil savôrs?!
◆ E la biciclete? Un grant mecanic al à fat il mont, e l’om la biciclete par gjoldilu (p. 59).
Nissune nostalgjie, però. La miserie e jere vere e la emigrazion e jere une sô brute consecuence. E po a vignivin lis vueris a menâ vie la miôr zoventût.
◆ E intal 1976, velu che si dismôf l’orcolat par sdrumâ mieç Friûl, come se nol ves vût za avonde disgraciis!
◆ Ma il voli si slargje ancje fûr dal Friûl, fin a rivâ ae maratone di New York o ben ai cjamps di concentrament li che al è passât Bruno Fabret che, daspò, al à vût il cûr di contâ la sô esperience intun libri e di lâ intes scuelis a presentâlu.
◆ La autore e cjale dut cuntun voli ironic sicu chel che al doprave l’Ariosto cui siei personaçs, cence judizis, e simpri cun simpatie.
Di segnalâ ancje lis siet ilustrazions rafinadis e la introduzion di Agnul Floramo. ❚