Un studi teatrâl su Michelstaedter

presentât dal Teatri Stabil Furlan al Mittelfest 2021
Tal “studi” metût in sene dal Teatri Stabil Furlan (TSF) tal cors di Mittelfest 2021, Carli Michelstädter – l’autôr di “La persuasione e la rettorica”, 1910, test che al fâs di lui un filosof studiât tant che i pensadôrs plui famôs dai agns prime de grande vuere – al rivîf sul palc la storie dal so leam cun Nadia.
◆ Carlo e Nadia si intivin a cjatâsi a Florence, li che lui al tache a studiâ piture e jê i fâs di modele, come a altris pitôrs. Lui al rive di Gurize, Imperi Asburgjic; je e je une esiliade russe. Ducj i doi a son ebreus no propit osservants. Lui al cîr une strade te vite; jê si è za dade anime e cuarp al socialisim rivoluzionari, e par chest e je stade refudade de sô famee di nobii impegnâts te industrie. Il leam di Carlo ae sô famee borghese e ae sô citât al è tenar e fuart, di no podê fânt di mancul. Di domandâsi: cemût àno podût deventâ amîs e dialogâ e influençâsi un cul altri?
◆ I lôr incuintris a son une bataie, un trussâ di ideis contrastantis, un svicinâsi e refudâsi;  dôs inteligjencis fûr dal ordenari che, cuant che si cjatin dongje dal vêr incuintri, de fusion iminente, si slontanin come par pôre di pierdi il slanç vitâl che al nas dal contrast. E cuant che jê e decît che al è rivât il moment di lassâsi, e fâs il pas definitîf, jessint di cjase vistude elegante come par un grant event, dopo vê scrit une letare a Carlo; e spassizant tal mieç de int par ben di Florence, si sbare un colp di pistole in bocje. Misteriose interpretazion de fin, vivude tant che un at di dignitât, bon di disberdeâ il grop masse ingredeât de sô vite. E Carlo al finirà cul lâi daûr.
◆ Partint dal test di Antonio Devetag, autôr di un copion impegnatîf in trê ats comissionât dal TSF – “Michelstädter. La grande trasgressione” – Claudio De Maglio, regjist dal studi, si è concentrât sul secont at, fasintlu sabulî cun zontis pescjadis tes letaris e tes poesiis di Carlo, ma ancje tes sôs  fantasiis estetichis e tai siei resonaments di pensadôr masse zovin e duncje inesorabil. Sul spazi de azion tetatrâl de glesie di Sante Marie in Cort di Cividât, i doi zovins atôrs (Dina Mirbakh e Radu Murarasu), biei e brâfs, si son mots amalgamant peraulis e moviments, olmis e segns, in secuencis tiradis, puartant dentri tal spetacul la anime dal public.
◆ Il studi al è stât recitât par talian, cun ca e là Nadia che si sfoghe in rus e Carlo che si sbroche par furlan; e al è stât presentât ancje a Udin, tal Teatri San Zorç, e a Gurize a Palaç Lantieri. Il progjet Michelstädter dal TSF al continuarà tai agns a vignî. ❚