I PROTAGONISCJ – Il destin di Zuan di Moravie, copât fûr de puarte dal Cjistiel

Zuan (Jan Sobieslaw) di Moravie al nas tor il 1355 di Zuan Indrì, fradi dal imperadôr Carli IV. La sô figure e je dibatude, cun versions antitetichis. Une e fevele di un om violent, che al dopre la fuarce par risolvi lis cuistion di podê, lussuriôs e plen di se. Chê altre, che si olme cun plui fature, lu mostre difensôr de Patrie cuintri dai Savorgnans e Vignesie. Dut câs, nol jere farine di fâ ostiis. Pape Urban, tal 1387, lu nomene patriarcje di Aquilee e lu sielç te famee dal imperadôr. Al è un segnâl, dopo i 2 agns di vueris dal patriarcje Filip d’Alençon, nomenâ un che al vedi la fiducie dal pape e la poie dal imperadôr. Al vûl dî che il pape al crôt ancjemò tal Patriarcjât. Zuan al cjate che Udin e la famee dai Savorgnans, cu la poie di Vignesie, a corin daûr di interès contraris ae Patrie. Zuan, cun man fuarte, al riforme il Renc di Udin, gjavant il podê ai nobii e nomenant rapresentants popolârs, un par ogni mistîr, e la riforme e ven fate buine dal Parlament. Subit al tache il conflit cun Fidrì Savorgnan che al cirive di imponi la sô signorie su la citât. Zuan al gjave il dazi su la farine e al jude la int. La sô e je une politiche moderne che e cjale aes dibisugnis de int. Dopo dal sassinament di Fidrì Savorgnan a scomencin svindics e violencis: il patriarcje nol pues plui stâ a Udin e si siere a Sofumberc. I udinês alore a mandin al pape un letare par domandâ di butâ jù Zuan cuntune liste di acusis penzis che a son o falsis o sglonfadis. Intune viertidure di pâs, Zuan al torne in citât e, la matine dai 13 di Otubar dal 1394, al ven copât di Tristan Savorgnan, fi di Fidrì, e altris nobii, fûr de puarte dal cjistiel di Udin.
◆ Al è curiôs che al fo il prin patriarcje a zurâ su lis Costituzions de Patrie, che lis sôs riformis a forin votadis in mût democratic e che la sô figure e je une vore studiade tal centri de Europe, impen che in Friûl e je metude in bande. ❚