FANTATS E FUTÛR. A Cjanive une biele esperience didatiche che e met dongje nature e yoga

Une realtât interessante e je chê de aziende agricule di Romina Silverio e Ivan Morocutti a Cjanive di Tumieç. Intant che Romina tai passons dal Varmost e tire dongje i cjavaluts pony par che a ledin a mangjâ, o rivìn a fâ une tabaiade svelte par telefon par capî alc di plui suntune ativitât che, dutune cul so om Ivan, a stan tirant indevant. E conte Romina: “Ivan di simpri al veve la aziende agricule, ma no di famee: al à studiât perît agrari e planc planchin al à metût in pîts cheste ativitât. Intun ciert moment al à cjapât la gjestion de malghe Varmost a For Disore. Dopo si sin cognossûts. Lui al stave pensant di comedâ cualchi stale a Trep di Cjargne ma al jere cualchi probleme burocratic: no jerin dutis sôs e, cun di plui, i proprietaris a jerin cetancj. Jo o lavoravi intun ufici tant che perît edîl. O vin vût la ocasion di cjatâ e duncje di comprâ un fabricât a Cjanive di Tumieç (al jere un ex maneç lât a la aste). Planc a planc, lu vin metût a puest. Dopo o vin vût un frut e o ai decidût di molâ il gno lavôr fis e di metimi in societât cul gno om.
◆ O vin ristruturât il fabricât daûr des nestris esigjencis. Cussì, cumò a Cjanive o vin la stale e dongje e je la fatorie didatiche e une piçule latarie. O vin vacjis, cjavris, un piçul arlevament di purcits, tra pôc o varìn ancje lis pioris e dopo o vin ducj i animâi de fatorie didatiche: ponys, cjavai, mus e animâi di curtîl.”
◆ Di Istât, Romina si ocupe de gjestion de Malghe Varmost a For Disore e Ivan al gjestìs Malghe Mongranda a Verzegnis.
◆ Romina e je il motôr e la anime di diviersis iniziativis che si fasin tant te fatorie didatiche che in malghe, e su chest e conte: “O ai organizât pai fruts la setemane in malghe, e la setemane in fatorie; dopo o fâs cors che a cjapin dentri la nature, il yoga e la art, o organizi cjaminadis te nature ancje achì in Varmost, insiemi cun Promoturismo. Chest an la setemane in malghe a Verzegnis e à vût un biel risultât: a jerin presits ben vincj fruts che a vignivin di ogni bande de Cjargne (di Prât, Paluce, Tumieç, Verzegnis, For Disore) cuntune etât che e partive dai 5/6 agns.
◆ Vint scomençât di pôc, o soi sodisfate, ancje se o scuen inmò imparâ tantis robis; ma biel planc, pas daûr pas, o lin indevant.
◆ O vin iniziativis di colaborazion cun altris realtâts dongje di nô: par me e je la maniere miôr par lâ indevant, parcè che un al à une robe e un a ‘nd à une altre, e insiemi o podìn fâ la diference. O vin la disponibilitât di prodots gjenuins a  chilometris 0, la verdure e ven dal vivâr Cacitti, jo o met i ûfs e po inmò la nestre produzion che e ven dal lat: formadi, spongje, scuete…”
◆ Romina e Ivan a son une vore impegnâts; cheste tabaiade svelte si ferme par vie di un fat particolâr che al sucêt tai passons dal Varmost: une cjavalute pony e à vût un abort spontani e cussì Romina scuen proviodi. Lavôr nol mancje e il timp al cor e no si pues fermâ: vê une aziende agricule al puarte un grum di lavôr e di cefâs.
◆ Cui che al à gust di lâ a curiosâ inte pagjine facebook https://www.facebook.com/lallegrafattoriatolmezzo/ al cjatarà in evidence lis novitâts dal moment che la aziende agricule e sta puartant indevant. ❚