Crisi in alte cuote tra siums al tramont e sperancis di rinassite

Pe prime volte intal zîr di 50 agns, intai prins mês dal 2021 la popolazion de citât di Tumieç e je lade sot dai 10.000 abitants. Une gnove che di une bande e fâs sglongjâ a fuart une cjampane pal centri di riferiment di dute la Cjargne, biel che di chê altre e je il spieli de crisi – aromai endemiche – de mont furlane. Stant aes statistichis de Oficine “Montagna” di Cantiere Friuli, in mancul di 70 agns la popolazion dal arc alpin furlan si è smiezade, cuntun indiç di vecjaie tra i plui alts di Italie (276%, cuintri nivei minims par Trentin, Val di Aoste e Lombardie), un indiç di natalitât une vore bas (5,7%) e une presince di forescj minime (3,6%). Juste par fâ cualchi esempli de dimension dal spopolament, de fin dal Votcent a vuê, il comun di Darte al è passât di passe 3.500 (intai agns Vincj) a 2.000 abitants, Scluse di 3.000 a 600, Comelians di cuasi 2.000 a mancul di 450, Dogne di 1.500 a 152, Drencje di 1.500 a 100, Lauc e Lusevare di cuasi 3.000 tai agns Vincj a mancul di 700, Mueç di passe 4.500 tai agns Vincj a mancul di 1.650 (cun frazions cence abitants dal dut), Tramonç Disore (passe 2.000) e Disot (passe 3.000) a mancul di 500. In dì di vuê, duncje, la densitât di abitants te zone de mont furlane e je di 18,7, cuintri il 63,5 dal Venit e il 78,5 dal Trentin. Piês di nô, dome la Sardegne, cuntune densitât di 17,5 abitants par chilometri. Ancje i dâts Istat a confermin che a pet de decressite furlane, lis altris zonis dal arc alpin no son cussì mâl metudis (fale che pal Belumat), cun areis che invezit a son daûr a gjoldi di une fuarte cressite, tant che Trentin e Sud Tirôl.
◆ Cun di plui, lis previsions pai agns a vignî a stimin une decressite cence padin, cu la pierdite di altris 8.000 personis intal zîr di 20 agns, cemût che al testemonee il studi “Atlante della montagna friulana”, par cure de cooperative Cramars (2019), che al à cirût di fâ ancje il pont de situazion economiche e sociâl. Tra i comuns di mont de provincie di Bolzan e chei de provincie di Udin e je une diference di redit di 2.000 € ad an, che a deventin cuasi 6.000 se si cjape in considerazion il paîs di Paulâr. Il lavôr, cun di plui, no dome al rint di mancul ma al è simpri plui dificil di cjatâ, cun cundizions che a sburtin soredut i zovins a scjampâ vie.
◆ Lis risorsis dal paisaç, dut câs, no somein jessi mancul valevulis di chês presintis intes altris regjons, anzit, propit il fat di jessi mancul “sburtadis” a nivel turistic al puarte tante int a preferî lis localitâts furlanis, cemût che a dimostrin ancje lis visitis di inteletuâi e personaçs televisîfs (come Michelle Hunziker a Dimpeç). Ce che al è mancjât ta chescj agns, invezit, al è un plan politic e strategjic, di mût che i fonts e lis normis (e di “eroi aristocratic” Michele Gortani al veve ben capît che cence di une leç la mont furlane – e in gjenerâl ancje chê taliane – no varès podût vê nissun disvilup) no lessin a colâ tal vueit.
◆ Lis iniziativis di sucès, dut câs, no son mancjadis e a ‘nt continuin a nassi, ancje in gracie di zovins cun snait e cun passion pe lôr tiere, che si inventin stradis gnovis e dinamichis par podê restâ intai lôr paîs. Par cuintri, no mancjin nancje lis propuestis cence cjâf ni cjaveç, che a volaressin tramudâ la mont intun parc di divertiments o ancjemò piês intune gjetade di ciment, come che nus ricuardin i progjets pe strade pal Marinelli o i invistiments par gnûfs implants par schiâ (cuant che buine part di chei za presints a son sierâts e no àn mai funzionât). Dismenteantsi, magari, che di passe trente agns i Comuns a spietin di vê une continuitât pai servizis di furnidure di gas metan o ancje dome pe rêt telefoniche.
◆ La svolte, però, e podarès rivâ propite dai aministradôr de zone, come che e dimostre la decision di metisi insiemi par dâ vite al progjet “Carnia 2030, par une tiere competitive in Europe”, li che a son za stadis metudis in pîts 15 taulis di lavôr par fevelâ dal avignî de mont cun ducj i sogjets interessâts (citadins, associazions, aziendis, privâts e, al è clâr, ancje l’ent public). Te stesse maniere, ancje 16 zovins assessôrs e conseîrs sot dai 40 agns a àn fondade la rêt “Cumò”, o ben Cjargnei unîts pe montagne, cun chê di stiçâ la gnove Comunitât montane de Cjargne (prime Comunitât a fâ bon il statût par cjapâ il puest de Uti) cu lis lôr ideis e propuestis.
◆ Il doman, in sumis, al somee jessi za su la puarte. E se e je vere ce che al diseve Leonardo Zanier, “doman no je une peraule, ma la sperance, no vin che jê. Doprìnle, fasìnle deventâ mans, voi e rabie e o vinçarìn la pôre”. E forsit ancje cheste disfide tremende cuintri dal impuariment de nestre mont. ❚