Impressions sul debut dal prin spetacul dal Teatri Stabil Furlan

La prime produzion dal Teatri Stabil Furlan e je rivade ai 29 di Mai, sul palc dal Teatri Gnûf Zuan di Udin, cuntun spetacul gjavât fûr di une opare di Siro Angeli, segnant un risultât gnûf, professionâl, straneant, biel. “La cjase: lagrimis di aiar e soreli” al conte une vicende implantade in Cjargne, svilupade cun ande veriste; ma trasformade, tal cors de traduzion e dal adatament par cure di Patui e Sartori, e plui di dut cu lis sieltis regjistichis di Carlotta Del Bianco, intune rapresentazion moderne, come liberade des leandis di lûc e di timp, che e tocje cantins di valôr universâl: un pôc espressioniste ma cence critiche sociâl svoladie; un pôc simboliste ma cence mediazions complicadis.
◆ Une storie di infedeltât dolorose causade de lontanace par vie de emigrazion, che si slargje in tragjedie lancurose e che e finìs cun segnâi tribulâts e incierts dal butulâ irecuiet de vite. Su la saldece des fondis de cjase, si ricêf clâr e sigûr il messaç de vôs dal nono, a pene une ombre sul sfont mudabil de sene, ma che no si lasse dismenteâ, ancje pe bravece dal atôr (Vladimir Jurc). Po si vierç un vâs di Pandore di sofladis, in zonte a ce che il test al dîs, sul sens des azions, su la inclinazion e sul temperament dai personaçs, cun zûcs di seduzion inceôs refudâts cun dolôr, sul displeâsi rusin dai dîs e dai agns.
◆ Il spetacul si davuelç intun timp unic, sclapât in dôs parts cuntun cjant, un lament che ti strissine
dentri te flabe, tant che un côr antîc che al complete la trame; musiche intime, segrete, componude e cjantade di Elsa Martin, che e fâs la part di Madalene, la protagoniste. E che e torne in sene, sierant il spetacul cul cjant de sô anime, distacade dal cuarp te volontât incontrolabile di scontâ il so fal.
◆ Ma ducj i atôrs a metin la anime e a van ricuardâts: Just, Paolo Mutti, om di Madalene; Pieri, Alessandro Maione, nevôt di Just e di Madalene, fi di Rose; Toni, Manuel Buttus, galandin malmadûr, fradi di Mie; Rose, Caterina Comingio, sûr di Just; Mie, Caterina Bernardi, amie di Madalene. Aiutant de regjiste Marta Riservato. Un spetacul furlan, e par furlan, di viodi, firmât di Carlotta del Bianco, cul so gust dal moviment in sene ben ingranât e svariât, cun cuadris vivents componûts cun biel ecuilibri, cu la cure ancje dal fruçon rindût vîf e colorât, tune incandessence creative continue che e inonde ancje il cûr dai siei atôrs. No sai dî se al è un spetacul perfet. Dal sigûr al è un spetacul di amirâ e di gjoldi. ❚