NATURE E AMBIENT. Inte ultime desene di agns, intal Lât di Cjavaç a àn nidiât cuatri gnovis speciis di uciei

Un habitat che in mont al è simpri plui râr
Il Lât di Cjavaç, incassât tra i versants des Prealps Cjargnelis, al è il plui grant lât naturâl dal Friûl e al ocupe une val, a soreli a mont de Mont di San Simion, incidude in profonditât di un cors antîc dal Tiliment.
◆ Cundut de antropizazion evidente che il lât al à patît intal timp, la sô posizion (ancje in graciis de vicinance cul Tiliment) e la presince di varis gjenars di ambients, a favorissin ancjemò la frecuentazion di diviersis speciis di uciei. Jenfri chês speciis, a son tantis leadis a la aghe che, intune situazion ambientâl dominade di boscs e monts, a cjatin intal Lât di Cjavaç un habitat just.
◆ In chest contest, lis indagjins che o ai puartadis indevant intal ultin periodi a àn permetût di verificâ la nidificazion di cuatri gnovis speciis di uciei: la Moratule Locustella luscinioides, il Penacjin Aythya fuligula, il Morgul Podiceps nigricollis e il Cauròs Aythya ferina.
• Moratule: e je une specie dal ordin dai Passeriformis (chel dai Passars) e de famee Locustellidae (piçui uciei di palût) cuntun grant areâl riprodutîf dilunc des mediis latitudins de Europe e de Asie. In Italie, e nidie dome intal setôr centri setentrionâl, inte plui part dai câs in zonis di cueste, di marine e di planure disot dai 200 m s.l.m. In Friûl e je scjarse e localizade, e si riprodûs pal plui in areis di marine; in passât si riproduseve ancje inte basse planure e a jerin stadis segnaladis nidificazions probabilis intal Friûl di mieç. Intal 2009 e je stade contatade une cubie che e dave di mangjâ a cuatri zovins saltâts fûr di pôc dal nît. Cheste e je stade la prime evidence di nidificazion de specie intal setôr setentrionâl dal Friûl e une des plui a Nord in Italie, e e je  impuartante par vie che al è sucedût fûr des zonis frecuentadis di solit de specie; cun di plui, si trate di une nidificazion sigure, dulà che invezit la grande part dai câs si riferìs a riproduzion pussibile o probabile.
• Penacjin: e je une specie dal ordin dai Anseriformis e de famee Anatidae (chê dal Masurin Anas platyrhynchos). Si riprodûs de Islande e de France fin ae Kamchatka e Sakhalin. In Italie e à tacât a nidiâ dome di resint. Dai agns 70-80 dal secul passât a son stadis verificadis lis primis nidificazions cun presincis in variis regjons, plui o mancul regolârs intal timp. In Friûl si riprodûs dal 2003. Intal periodi riprodutîf e frecuente lis aghis dolcis di lâts, flums, pocis – ancje di estension modeste – contornadis di vegjetazion. Intal setôr setentrionâl dal Friûl, de metât de prime desene dal secul a jerin stadis viodudis cubiis intal periodi di nidificazion ma nol jere stât pussibil aciertânt la presince: la prime e je stade verificade intal 2014 cuant che e je stade viodude une mascje cun doi poleçuts di cirche 15 dîs. La riproduzion e je stade confermade ancje intai agns dopo (la ultime, l’an passât). Il câs ripuartât al è il prin in zone montane furlane e un dai plui a Nord in Italie.
• Morgul: e je une specie dal ordin dai Podicipediformis e de famee Podicipedidae (chê dal Mangjebalins Tachybaptus ruficollis e dal Frisul Podiceps cristatus) cuntun areâl grandonon (Americhe, Afriche, Eurasie). In Europe, la plui part de popolazion si riprodûs in Ucraine e inte Russie meridionâl. In Italie si sa di cualchi desene di nidificazions, in particolâr in Sicilie e in Emilie Romagne, dulà che al è stât regjistrât cirche il 50% des riproduzions. In Friûl, la presince di individuis e/o cubiis par dut il periodi riprodutîf e jere cognossude, e intai ultins agns e jere deventade regolâr ma la riproduzion no jere ancjemò stade aciertade fintremai tal 2018, cuant che e je stade viodude une cubie cun trê poleçuts di pôcs dîs. La nidificazion ripuartade e je la prime in Friûl-Vignesie Julie e in dut l’arc alpin orientâl, e la plui setentrionâl in Italie. In dì di vuê, il Lât di Cjavaç al è l’unic sît intes Alps orientâls dulà che e je stade verificade la riproduzion di dutis lis speciis di Podicipedidae che a nidiin in Italie: Mangjebalins, Frisul e Morgul.
• Cauròs: specie de stesse famee e dal stes ordin dal Penacjin, che si cjate une vore slargjade inte regjon paleartiche. E nidifiche de Europe ocidentâl ae Mongolie e ae Daurie. In Italie si riprodûs massime dilunc des cuestis e intes planuris des regjons setentrionâls (includût il Friûl) e intes isulis plui grandis, e i prins events di riproduzion a son stâts aciertâts inte seconde metât dal secul XX. Ancje in chest câs, la presince de specie intal periodi just pe nidificazion intal setôr setentrionâl dal Friûl si cognosseve di timp, ma cence provis che e fos avignude. Intal 2020 e je stade viodude un mascje cun doi poleçuts e verificade la prime nidificazion in zone montane furlane, che e je ancje une des plui a Nord in Italie.
Dutis lis nidificazions ripuartadis a son colegadis a strent cui ambients di spuinde dal Lât di Cjavaç e no nome, ma in mût particolâr cu lis paluderis che a son caraterizadis dai cjanêts di Cjane di aghe Phragmites australis. Chest al è un habitat impuartant par tantis speciis di animâi (che si viodi La Patrie, Otubar dal 2020) e, par vie de antropizazion e dai intervents che di solit a vegnin fats cence tignî in considerazion lis esigjencis di chês altris creaturis viventis, in mont al è simpri plui râr; di fat, inte mont furlane a son restâts pardabon pôcs e chei dal Lât di Cjavaç a son fra i plui impuartants pal mantigniment de biodiversitât. Se o considerìn, cun di plui, che lis paluderis a son di solit consideradis ambients “plens di jerbatis” (che si viodi La Patrie, Otubar dal 2020) e che “no coventin a nuie” e duncje di eliminâ, si pues facilmentri previodi cuâl che al sarà il destin di chescj biotops se no si cambie in maniere radicâl il mût di considerâ l’ambient.
◆ Intes ultimis desenis di agns, di fat, la aree dal Lât di Cjavaç e je stade ancjemò plui antropizade in consecuence di une vision che e previôt un sfrutament cun finalitâts turistichis e ricreativis, basadis su intervents invasîfs, e leât ancje a events di masse; chest,  insiemi cun operazions silviculturâls puartadis indevant in mût aprossimatîf e che a àn semplificât e impuarît i boscs di spuinde, al à vût un impat negatîf su habitat e speciis.
Il Lât di Cjavaç, ancje in graciis des nidificazions ripuartadis culì parsore, al è un sît impuartant a nivel di Alps orientâls e duncje, cemût che o ai auspicât di diviers timp, al va tutelât atuant dal moment azions smiradis a conservâ e a miorâ l’habitat e a favorî lis speciis, massime chês cuntun stât di conservazion sfavorevul.
◆ Par fâ chest, si à di finîle di pierdisi in cjacaris, e dâ in man la cuistion a chei che si intindin di problemis ambientâi; tocje agjî cun presse, se no si riscje la pierdite di un fra i ambients caraterizâts de aghe plui impuartants de aree alpine. ❚