Ancje la marilenghe e jude cuintri des trufis ai anzians

Une campagne di prevenzion par furlan par sensibilizâ cuintri des trufis e des robariis a dam des personis anzianis: e je cheste la iniziative che e met dongje la Cuesture di Udin e la ARLeF, che a àn clamât il Teatro Incerto e Catine par realizâ 4 messaçs video in marilenghe. L’obietîf al è di meti in vuaite cuintri cheste cause frecuente di alarme sociâl e cuintri chescj delincuents che a colpissin lis personis, in particolâr chês che a son di bessolis, sedi in cjase che in ambients publics. La prevenzion e je duncje fondamentâl par che i anzians, ma no dome, a imparin a ricognossi il pericul e par che a sepin cemût fâ par no jessi imbroiâts. E par rindi ancjemò plui eficaç e diret il messaç dai cuatri videos, la Cuesture e à pensât di fâju in marilenghe cul jutori de ARLeF. La campagne e fronte lis situazions di imbrois e di pericul plui comunis: al bancomat, a cjase, al telefon, vie email. I protagoniscj a son atôrs furlans famôs: Caterina Tomasulo, o ben Catine, e Fabiano Fantini, Claudio Moretti e Elvio Scruzzi dal Teatro Incerto. A son lôr a dâ, cu la ironie che ju caraterize, i conseis par evitâ lis trufis. Ocjo duncje a “no vierzi a personis che no si cognossin che a tuchin te puarte, ancje se si presentin tant che funzionaris publics o a disin di jessi assegnâts ae riscossion di paiaments”; o a “chei che a telefonin par obleâti a firmâ il contrat di une gnove utence”. Cun di plui – al vise il messaç dedicât aes fraudis svilupadis cul web – “mai comunicâ par pueste eletroniche dâts bancjaris o personâi”. E al bancomat – e va indenant la campagne – “sta atent che nissun ti cjali cuant che tu digjitis il Pin”. ◆ In ducj i câs, ancje in chel di un sempliç dubi, i citadins a son invidâts a contatâ daurman lis Fuarcis di Polizie. A ribatilu in ogni video al è propit il Comissari Mara Lessio, de Division Anticrimin de Cuesture di Udin, che e invide a clamâ simpri, “cence pôre”, il Nue (Numar Unic pes Emergjencis) 112. La campagne di prevenzion e je stade presentade dal Cuestôr Manuela De Bernardin, dal assessôr regjonâl aes autonomiis locâls Pierpaolo Roberti e dal president de ARLeF Eros Cisilino: e sarà passade par dut il mês di Lui ancje sui canâi social de ARLeF, tant che Facebook, Instagram, YouTube e WhatsApp. I videos si cjatin ancje sul sît de Agjenzie. ❚
Redazion