Sfuei Mensîl Furlan Indipendent
Archivi de Patrie

ART TAL TAC. “O soi libare, mi sint libare…”

Moira Pezzetta

La musiche e je “libære”
cu lis Ladies’ Juke-Box

Si son cognossudis pe prime volte 14 agns indaûr te scuele di musiche dulà che a studiavin dutis dôs. A son lis Ladies’ Juke-Box, dôs zovinis cjantautoris che chest an à an publicât il lôr prin singul.
◆ Eva, che te scuele di musiche e studiave cjant, e Anna, che si esercitave cu la ghitare, a àn duetât pe prime volte suntun toc dai Beatles, par un saç de scuele. Il timp lis à fatis pierdi di viste, ma si son tornadis a cjatâ tal 2019, e tal 2020 a àn tacât chest progjet insiemi.
◆ Il non che a àn sielt pal lôr grup al è Ladies’ Juke-Box. Sul imprin, il non al è nassût come format, o miôr un spetacul di covers dulà che il public al veve la pussibilitât di interagjî cun lôr par decidi la scjalute di sunâ e al veve ancje la pussibilitât di fâ dedichis.
◆ Cul sucès che à an vût, a àn decidût di tacâ a produsi i lôr tocs, e a àn tignût il non che al rapresente di fat la anime dal duet. Lôr a son dôs “ladies” e “Juke-box” al fas vignî tal cjâf la imagjin che e puarte indaûr intun periodi di aur pe musiche e dulà che lis personis a stavin insiemi scoltant la musiche trasmetude dal Juke box.
Par componi i lôr tocs a cjapin ispirazion di artiscj che a vegnin dal mont rock classic, folk e popolâr. La lôr musiche e je duncje il risultât di un insiemi colorît di gjenars diviers: dal metal ae musiche classiche, passant pal progressive, pop, country, blues e melodiis etnichis.
◆ Pe fieste de Patrie dal Friûl a àn publicât la anteprime dal lôr singul “Libære” cjapant spont di une poesie regalade de mari di Anna.
«O vin decidût di doprâ cheste poesie par componi il nestri prin toc: nus conte parcè che la musiche in chest periodi storic dificil nus fâs sintî libaris. In plui, si sposave ancje ben cul teme de mostre di “Crevaduris” dulà che o vin partecipât par scomençâ l’an.»
◆ Il titul scrit cun “æ” al rapresente il concet di libertât ancje linguistiche, parcè che al figure in maniere grafiche la peraule sedi par furlan che par talian.
◆ Chest an a vuelin publicâ un EP, che lôr a definissin “concept”, sperimentant la composizion di tocs in trê lenghis: talian, inglês e furlan.
Chest EP, nus contin «al varà tant che teme il viaç traviers des lenghis. Une lenghe, in plui de sô sonoritât particolâr e puarte cun se un bagai socioculturâl. O volìn cussì dâ la pussibilitât al scoltadôr di viazâ traviers de musiche, cu la musiche».
Insiemi al teme dal viaç, a tegnin cont di trasmeti une imagjin no stereotipade de femine. «Si pues jessi intraprendentis e feminîls ancje cence jessi sclavis o sometudis de proprie feminilitât.»
Ladies’ Juke-box al è un mût par lôr di esprimisi cence masse filtris. «O volìn divertîsi, sperimentâ, emozionâsi e emozionâ cu la nestre musiche.»
◆ Anna e Eva a àn tacât chest percors ancje par jentrâ in contat cun culturis diviersis e par creâ colaborazions cun musiciscj ancje tant diviers di lôr.
◆ “No dineìn il fat che nus interesse ancje l’aspiet comerciâl di vivi cu la nestre musiche, ma savint che dut chest al compuarte spes il fat di adatâsi a un marcjât che al impon il so volê, pal moment o volìn dome jessi nô stessis e acetâ dut ce che chest al compuarte.”
◆ Pal lôr prin toc origjinâl a tegnin a ringraciâ ducj i artiscj che a àn colaborât cun lôr: Sara Formoso Fábregas, armoniciste galiziane (Spagne) che e lavore cun Le Cirque Du Soleil, il baterist Matteo Borro, il videomaker Andrea Versolatto, la tradutore Lucia Gazzino e delfabro®️.
Par scoltâ i lôr tocs, par cjalâ i lôr videos e par savê cuant che o podarìn scoltâ i lôr concierts atôr pal Friûl, o podês stâur daûr sui canâi social Facebook, Instagram e Youtube.
Par supuartâ la lôr musiche cuntune donazion, lait sul sît ko-fi (https://ko-fi.com/ladiesjukebox). ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +