Sfuei Mensîl Furlan Indipendent
Archivi de Patrie

LIBRIS SIMPRI BOGNS. Pierluigi Visintin, Friûl e furlans te histoire de ma vie di Giacomo Casanova, Pasian di Prât, 2004

Laurin Zuan Nardin

“Al somee propite che i vons de bande de mari di Casanova a sedin stâts furlans. Di fat, tal cjapitul 1 de Histoire de ma vie, Giacomo al scrîf che in face ae cjase di so pari, atôr comic che al recitave tal teatri Sant Samuêl di Vignesie, al jere a stâ un cjaliâr che si clamave Gerolamo Farussi cu la sô femine Marzia e cuntune bielissime fie di sedis agns, Zanetta”.
◆ Visintin, in cheste vore che e à vût vinçût il premi San Simon intal 2003, al è une sorte di Sherlock Holmes che al scrutine rie par rie lis memoriis dal venezian e ogni volte che al cjate un pussibil riferiment al Friûl lu confronte cun altris documents come che i compet a ogni storic che al sa fâ ben il so mistîr tant di jessi in stât di corezi altris storics (p.55). E di jenfrisegns pe sô tesi a ’nt cjate tancj, tacant dal cognon Farussi che al diven di farut, piçul fari, tiermin furlanon (par venezian al sarès stât ‘Favero’). Ancjemò plui ‘furlan’ al è il ritrat de none, Marzia, femine fuarte che e adore il so nevodut e che, cuant che e mûr no i lasse nuie par vie che i veve dât dut ce che e veve biel che e jere inmò vive. Furlans a Vignesie a ’nd jerin tancj: fachins, faris, cjaliârs, marangons, camarîrs, splanadôrs, lustradôrs. O ‘feralants’, vâl a dî chei che a compagnavin di gnot pes stradelutis de citât cui che al podeve permetisi di paiâ. Lis feminis a podevin jessi baiis, lavanderis o ben a servizi sicu Luzie di Pasian, une biele zovine, la uniche salacor che il sedutôr Giacomo no si profite di jê e che, secontri lui, propit par chest motîf e varà une vite tant disfortunade. Al jere ancje cualchi nobil, ma cuasi simpri malsestât. Furlans a son doi compagns di presonie di Casanova ai Piombi di Vignesie: l’usurari Sgualdo Nobili e il cont Asquini, un autonomist ante litteram e om coragjôs, ancje se une vore tirât sui bêçs. In plui di personis o cjatìn ancje altris riferiments furlans: il Refosc (ma no il Picolit, e chest al è strani), la polente, il bal ‘la furlane’. E ancje localitâts dal Friûl tant che Gurize, Montreâl, Spesse di Caprive, Cormons. A restin, dut câs, ancjemò une vore di cjantons scûrs inte vicende sedi di Casanova stes (la setemane misteriose a Udin), sedi dal manuscrit origjinâl des sôs memoriis. Al coventarès un altri Sherlock Holmes, ma dulà cjatâlu cumò che Pierluigi nol è plui? ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +