Dal prin di Lui e fintremai la fin dal 2021 al tocjarà ae Slovenie il turni di presidence dal Consei de Union europeane. La presidence slovene dal grup dai 27 stâts membris de Union e rive intun moment cetant impuartant par dute la Union, li che si cjale ae riprese daspò de pandemie di Covid-19. Par chest il president dal Consei dai ministris sloven, Janez Janša, che in Slovenie al vuide une coalizion di centridiestre, in chestis setemanis al à cetancj incuintris fisics e virtuâi cun esponents de politiche a nivel european e no dome.
◆ Une vore di mieçs di comunicazion slovens a ripuartin di avonde timp che il so guvier al podarès colâ, ma pal moment al à simpri tignût bot. Lis iniziativis de oposizion di centriçampe par metilu in dificoltât no son mai stadis avonde fuartis, come nancje lis acusis di autoritarisim o di dipendence de Ongjarie di Viktor Orban, lis protestis in place o i scandui che a àn cjapât dentri ministris de sô coalizion di guvier.
◆ A nivel internazionâl si à tacât une altre volte a fevelâ une vore di Janša e dal so guvier te prime metât di Avrîl, cuant che il portâl politicki.ba al à publicât la gnove di un document che al proponeve modifichis ai confins te zone dai Balcans. No si sa pal sigûr se chest document, che i media slovens a clamin “non-paper”, al esisti, dulà che al sedi nassût e in ce maniere che la Slovenie i sedi leade. Ma si capìs dal moment trope confusion che si sedi puartât daûr un scrit li che si fevele di gnûfs confins intune zone cun cetantis diferencis etnichis e cuntun passât dificil come chê dai Balcans. Bielzà te introduzion, il scrit al nomenarès lis cuistions nazionâls no risoltis dai serps, dai albanês e dai cravuats, che a son vignudis fûr de dissoluzion de Jugoslavie. Tal document, pe Serbie e pal Cossovo si figuraressisi cun dificoltât une prospetive europeane; pe Bosgne e Erzegovine si podarès ancje escludile. A profitâ di chest vueit e sarès la Turchie, che e à aumentade la sô influence te Bosgne e Erzegovine e te Macedonie dal Nord.
◆ La “soluzion” che il document al proponarès e je la union dal Cossovo cu la Albanie, ancje parcè che cheste e sarès la volontât dal 95% de popolazion dal Cossovo. La part a maiorance serbe dal Cossovo, simpri daûr dal document, e podarès otignî une autonomie sul model dal Sudtirôl.
◆ Une altre “soluzion” che il document al tirarès fûr e sarès la union de plui part dal teritori de Republiche serbe (che insiemi cu la Federazion di Bosgne e Erzegovine e met adun il stât di Bosgne e Erzegovine) ae Serbie, cu la justificazion che cussì e sarès risolte in buine sostance la cuistion nazionâl serbe. Tal document si sosten ancje che in chest câs la Serbie e podarès acetâ la union dal Cossovo cu la Albanie.
◆ Simpri daûr dal non-paper si podarès risolvi la cuistion nazionâl cravuate o midiant de union dai cjantons de Bosgne e Erzegovine a maiorance cravuate ae Cravuazie, o midiant de concession di une autonomie “sul stamp  sudtirolês” ae part de Bosgne e Erzegovine a maiorance cravuate.
◆ Daûr dal document, i bosgnacs musulmans a rivaressin a vê un stât indipendent e, midiant di un referendum, a podaressin sielzi se jentrâ o no te Union europeane.
◆ Al è facil figurâsi dutis lis reazions che e à vût la gnove de pussibile esistence dal non-paper a nivel di politiche interne e internazionâl. Tal Parlament sloven i deputâts de maiorance di centridiestre e di oposizion di centriçampe si son butâts in muse un cun chel altri di vuastâ la reputazion internazionâl de Slovenie. De coalizion di guvier a àn acusât la oposizion di vê fat dal non-paper un câs mediatic e di meti a risi la presidence slovene dal Consei de Union europeane. ❚

Luciano Lister