Sfuei Mensîl Furlan Indipendent
Archivi de Patrie

Cuant che lis vacjis si clamavin par non

Walter Tomada

Un biel lavôr di Gianni Colledani pal Comun di Clausêt
“Il timp dal fen e da la vacje. Cuant che i animâi si clamavin par non” al è l’ultin libri di Gianni Colledani, editât dal Comun di Clausêt, ma al è ancje un viaç. Un viaç intun altri timp e intun altri mont, là che dutis lis  vacjis a jerin stimadis pardabon cuasi come membris de famee e la int si sigurave, se e rivave, che lis  bestiis a fossin curadis e cressudis tant che i fruts di cjase. Di chestis creaturis a cuatri çatis al dipendeve di fat il sostentament di chês di dôs: cjar, lat, formadi, spongje a jerin il risultât di un lavôr lunc dulà che i animâi a vignivin puartâts a passon par itineraris luncs, il fen al costave fadie ma al jere timp ben spindût. Dut ce che a produsevin, ancje la buiace, al deventave un imprest fondamentâl par judâ la nestre int a frontâ il mistîr, no masse facil, di sorevivi.
◆ La fuarce di chest libri e je chê di meti su la cjarte e no fâ dismenteâ no tant i nons des bestiis che a àn fat la fuarce di cetante int des valadis dulintor, ma soredut dut il lessic specific che l’autôr al à tirât dongje intun glossariut specific, une “grampe di peravoles”, al dîs Colledani, memoreant la ete dulà che i Asìns a jerin tant nomenâts pe lôr produzion di formadi salât di rivâ a vendilu fintremai a Triest e a Vignesie. In cheste ultime citât, la buteghe di formadi plui preseade e jere chê di Nane Casolin, nassût propit a Clausêt (si clamave Giovanni Battista Colledani), partît puar viers la lagune e muart culì, siôr di fâ pôre, tal 1741.
◆ La fuarce di chest libri e je propit tes peraulis che la selezion atente dal autôr e salve, e no lasse che a passin “la ultime frontiere de memorie”. Tiermins che a spieghin l’at dal molzi e lis sôs fasis diferentis, i imprescj che a vignivin doprâts par tignî a ments e par clamâ dongje lis diviersis varietâts di vacjis e pioris, e ancje inte produzion di lat, spongje, scuete e formadi. Si scuvierzin tantis peraulis che a zontin la lenghe dai arlevadôrs e fedârs di chenti al todesc: par esempli la “cruchigne” che e covente a tignî in man il falcet, la “raine” che si dopre come scudiele, il “celâr” par tignî sierâts i prodots, che ancje se al derive dal latin, chenti al è rivât dal todesc “keller”; e po il “frustin”, che nol covente a bati, ma e jere la mirinde, derivade di “frühstück”;
o il “massanc” e il “racli” che chei sì a coventavin a bati, tant che magari, prin di lâ tal “loder”,
une bancjute cuvierte di fen,
a polsâ par cualchi ore.
◆ Si scuvierzin ancje rimedis come il “larian”, la pês dai arbui di laris che messedade cu la sonze e coventave a onzi cui che al cjapave pachis o stuartis: “il Voltaren dai puars”, lu clame Colledani.
E cuissà se al podarès jessi bevût ancje vuê il “camon”, lat bulît messedât cul vin? Tocjarès cerçâlu ma salacor cence chest lavôr di ricercje preseabil e complet a nissun i vignarès tal cjâf che i nestris vons a bevevin,
oms e feminis chest “cocktail”
par fâ passâ la sêt intant che a levin a fâ fen.
◆ Il volum di 156 pagjinis al è une vore biel ancje pe ricercje su la ativitât di arlevament e casearie di Sandro Menegon e pes testemoneancis, cjapadis sù di Giuliana Fratta, de int dal lûc che e conte lis storiis di cuant che si leve in malghe. La linie dal timp si ferme, al conte Giuliano Cescutti, “cuant che il ledan al à tacât a puçâ”: in chê volte i animâi no son plui stâts “di famee”, ma pai furlans a son deventâts “forescj”. Cuissà se e vignarà une dì che o tornarìn a clamâju par non. Ducj. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +