Il Teatri Stabil Furlan a la Setemane de Culture Furlane

“Dante par furlan – Valutazion
di un’esperience”
Par causis di fuarce maiôr, che si cognossin ancje masse ben, il Teatri Stabil Furlan (Tsf) nol à inmò podût debutâ dal vîf cul so prin spetacul teatrâl. Il prin dal prin cartelon di un teatri furlan di nivel. Sedi a stai la prime di “La cjase, lagrimis di aiar e soreli”, adatament da l’opare “La casa” dal poete e dramaturc cjargnel Siro Angeli (1913-1991), a trente agns de so disparide.
◆ Se dut al va secont lis previsions e lis sieltis dal guvier talian, da la fin di Avrîl intes zonis zalis si son tornâts a vierzi ancje i teatris, cun ducj i limits di capience e lis precauzions anticontagjio. E magari cheste e je la volte bine di rivâ a viodi e sintî, di chi a pôc e dal vîf, in sene, la rapresentazion da opare di Angeli, sot lis curis de regjiste Carlotta Del Bianco e di un grop di atôrs zovins, professioniscj, preparâts.
◆ Par assurt, ancje se nol è inmò partît il Tsf nol si è nancje mai fermât. E al met a dum e in rêt lis sôs ativitâts in cors, sedi traviers il sît internet che o invidi a frecuentâ (teatristabilfurlan.it), i canai social come Facebook e Instagram, oltri che a traviers la partecipazion a programs radiofonics, come tal program “Vuê o fevelin di…” in lenghe furlane de Rai, e la colaborazion cul canâl televisîf Telefriuli (Canâl 11 e 511HD). Che al à trasmetût dilunc Març e Avrîl, cun cadence setemanâl, lis siet pontadis dal progjet “Dante par furlan” in colaborazion cu la Fondazion De Claricini Dornpacher, par biei contribûts video regjistrâts tal Teatri Giovanni Da Udine e dedicâts a l’Infier de Comedie dantesche, videos che si puedin cjatâ ancje in rêt.
◆ Tra lis iniziativis ciertis, par un Tsf che al à savût cun dutis lis precauzions menâ indevant lis provis e la prevision des sôs progjetualitâts, e je la partecipazion ae otave edizion de Setemane de Culture Furlane de Societât Filologjiche Furlane. Une otime vetrine par contâ il progjet dedicât ai 700 agns de muart dal poete fiorentin.
◆ “Dante par furlan – Valutazion di un’esperience” al è il titul da l’incuintri che al sarà trasmetût sabide ai 15 di Mai aes 21 in streaming su setemane.it, cun Oldino Cernoia, Carlotta Del Bianco e Paolo Patui, che al à curât l’introduzion ai videos dedicâts, oltri che dal president de Sff Federico Vicario e dal Tsf Lorenzo Zanon. Une ocasion par discori e fâ une prime valutazion dal progjet che al si è basât su moments sielts da l’Infier de Divine Comedie voltade par furlan di Aurelio Venuti. Un motîf par vanzâ valutazions e proposizions intor da l’ûs de marilenghe a varis nivei, rivant a tocjâ ancje il teme de impuartance des traduzions te vite di une lenghe. ❚
A.S.