Gnovis fuarcis par insegnâ la marilenghe inte scuele

Mai come ta chest moment, la scuele e je daûr a patî, morestade di dute une schirie di intrics e di cjamis che le rindin ogni dì plui debile.
◆ No cate il periodi grivi, dut câs, al somee che cualchi semençute e vedi rivât a menâ intal prât dal insegnament de lenghe furlane (ancje se cualchidun al veve cirût di impestâ dut cul diserbant di cualchi circolâr li che si autorizave la sospension dal progjet). La iscrizion di cuasi 200 docents ae ultime edizion di Marilenghe & Mariscuele, di fat, e lasse ben sperâ, cussì come che a confuartin i materiâi simpri plui ben fats a disposizion dai mestris midiant dal Docuscuele. Cun di plui, in Universitât, in gracie de professore Fabiana Fusco, si è daûr a lavorâ su la certificazion linguistiche, biel che in curt al tacarà un progjet di colaborazion tra Lavagne Plurilengâl e CIRF (Centri interdipartimentâl pal svilup de lenghe e de culture dal Friûl), pal insegnament inte scuele secondarie di secont grât.
◆ Lis gnovis dal Ateneu, dut câs, no son finidis achì, parcè che a son a pene saltâts fûr i prins laureâts dal curriculum pal insegnament in lenghe furlane di Siencis de Formazion primarie, inviât intal 2016. Dopo cualchi an di prove, la talee di cheste ufierte formative e somee vê metudis lidrîs, stant che simpri plui students si iscrivin e si apassionin ai cors.
◆ Tra lis materiis, o cjatìn “Leterature furlane” e “Didatiche de lenghe furlane”, par cure dal professôr Gabriele Zanello, che o vin intervistât par capî miôr cemût che al funzione chest percors.
__
Professôr Zanello, trops students sono iscrits al curriculum pal insegnament in lenghe furlane?
Ore presint i iscrits a son une cincuantine, intune proporzione che e je il spieli de situazion di Siencis de Formazion primarie, ven a stâi che i fantats a son une vore pôcs; nô o ‘nt vin dome doi.
__
Trops students si sono za laureâts?
Cumò e je saltade fûr la prime butade di uns dîs di lôr, che a vevin tacât a frecuentâ i cors dal curriculum tal lôr secont an, il 2016-2017.
__
Isal cualchidun che al à cjapade par buine la indicazion di scrivi une part di tesi par furlan?
Sì, plui di cualchidun lu à fat, par altri za prin che al vignìs istituît il curriculum. Stant al Regolament, i students a puedin scrivi une buine part de tesi in lenghe furlane; l’abstract al ven scrit in dôs versions: taliane e furlane. I students a àn di scrivi la documentazion finâl di tirocini componint une sezion par furlan, e ancje un abstract, simpri par furlan. Cun di plui, vie pal esam di lauree la comission e pues fâ une domande par furlan.
__
Nus disial alc di plui su lis tesis di lauree dai students?
Lis tesis che o ai vude maniere di stâi daûr ta chescj agns a son dutis interessantis e diferentis; l’aspiet plui impuartant al è che, ancje cuant che si lavore sul patrimoni tradizionâl (flabis, nainis, rimarolis, zûcs), i tescj no vegnin studiâts cuntun implant superficiâl o nostalgjic, ma a vegnin analizâts in mût aprofondît te lôr nature e a vegnin valorizadis dutis lis lôr potenzialitâts educativis e (gloto)didatichis.
__
Ce si fasial intai laboratoris peâts al insegnament de lenghe?
Chescj laboratoris a proviodin “buinis pratichis” par gjestî une scuele plurilengâl, par insegnâ a lei e scrivi in presince di plui lenghis, par svilupâ tai fruts la competence comunicative e il plasê de leture in plui lenghis; cun di plui a permetin di frontâ argoments – come chel des abilitâts di leture-scriture – che la ricercje sientifiche e puarte in evoluzion continue.
__
Ce pês aial in dì di vuê chest percors formatîf pe iscrizion inte liste regjonâl dai insegnants pe lenghe furlane?
Chest percors al è un dai titui che a dan dirit di jentrâ; dut câs al è impuartant che lis laureadis a fasin cognossi ai dirigjents cheste lôr competence specifiche, che pal moment e je alc di unic. O vin domandât ae Regjon e al Ufici scolastic regjonâl che la lauree otignude frecuentant chest curriculum e sedi un titul a part te tabele, di mût che a sedin ricognossûts ad implen la sô specificitât e il so valôr. ❚
S.F.