CULTURE – La tv furlane… di no lei par furlan!

Premetìn che in television dut al fâs brût. E che duncje la nassite di un gnûf canâl e va tal frico de za numerose possibibilitât di sielte. Cussì, cualchidun no si sarà nancje visât di vê notât une gnove rêt televisive in Friûl. Il batisim al è stât ai 21 di Setembar. Si clame “Free”, tant a dî “libar”, ma cun assonancis (?) cu la lidrîs de peraule Friûl. E sarès, in pratiche, la sede di Udin di Antenna Tre e TeleNordEst, che e à cessât lis sôs trasmissions tant che sede distacade dipendent di Trevîs, par davuelzisi in rêt autonome. La volontât e l’investiment a rivin dal so editôr: il grup “Panto”, chel dai barcons.
“Free” e à un redazion che e scree une informazion autonome ancje rispiet a Triest. La sede di cheste citât alabardade e je finide sot la ombrene di “Free” ma il baston dal comant, chest viaç, al è in mans a Udin. Di Triest a fasin il lôr tg ma lu trasmetin di Udin, cuntun condutôr/condutore di Udin e come orari al ven prime di chel di Udin, aes siet. Cussì, i triestins a fevelin dal lôr teatri e de feriere di Servola, cence infestâ il gazetin televisîf dal Friûl. Come che in maniere sistematiche – e storichementri – si è simpri fat culì dai Tgr de sede Rai pal F-VJ.
Studis gnûfs, siglis gnovis, dutis coloradis. A son in pôcs ma a lavorin cetant. E la concorince e fasarà ben ancje a Telefriuli che cussì, par no fâsi viodi di mancul, si scugnarà par fuarce adeguâ. Ce i mancjial? Se une television e vûl penetrâ un teritori di riferiment e à di pontâ su lis sôs carateristichis. E achì si inclaude il discors marilenghe che, no cate cualchi pontade dal za recensît program “Mandi”, nol à in pratiche rapresentance.
Par cuintri, la emitente e à gjavât fûr dal cjapiel un personaç che no viodevin dai timps dal ribalton di Telefriuli, cuant che si tornarin a disegnâ i ecuilibris dentri de proprietât: cui no si visial di chel personaç colorât che al è Lorenzo Petiziol, che al berghelave e si scjaldave tant des diretis dal Udin? Par lui, l’incaric al è chel di diretôr di rêt. E però al condûs ancje i programs sul balon: cemût dineâ la specializazion e la carateristiche di ponte dal sogjet?
Si che duncje, cumò il probleme al sarà la penetrazion sul teritori, la afermazion e la ricognossibilitãt de marcje, la racuelte de publicitât. Za la impronte inovative le à puartade la proprietât: investint suntune gnove rêt. Dome tra un an, o capirìn se Free al sarà pardabon Free, e no une “Free”-ade.
Jan Toti