I boscs no son zone francje

Intal nestri imagjinari la Austrie e je il paîs par ecelence dal relax, dal svagament e dal sport, par vie des monts e dai siei boscs. No si à di dismenteâ dut câs che il bosc nol è dome un lûc di ricrei, ma par tancj di lôr al è un puest di lavôr, font di vuadagns e di vite e duncje no je une zone francje, là che si pues fâ di dut.
◆ La leç forestâl e dîs che cualsisei al puedi jentrâ e restâ par fins ricreatîfs trop che al vûl intun bosc, cence vê il permès dal paron che, par dî il vêr, nol pues vierzi il bec al rivuart e al à di gloti la presince di forescj, ben o mâl che i stedi. A son propit pocjis ecezions a cheste regule, dome par cualchi bosc particolâr, par chei a pene plantâts, pal camping, pal passaçs di machinis e di cjavai. Se vie pal Istât a son soredut vacancîrs e int che e cîr foncs che si zove di chest dirit, di Invier o cjatìn schiadôrs alpins, di fonts, gjaspoladôrs e simii, che a bramin di scuvierzi la nature invernâl incontaminade fûr dai solits percors e, se no si cjatin i skilifts, nol è improibît di schiâ vie pai boscs, fûr des pistis. Il vistiari, che al pare simpri miôr dal frêt, e i imprescj simpri plui tecnologjics a judin simpri di plui chestis ativitâts a cualsisei temperadure, e chest al da cualchi probleme aes voris leadis al bosc. No si à di dismenteâsi ancje che il bosc al è l’habitat di cetantis speciis salvadis e il lôr rapuart cul om al pues deventâ une vore dificil. Cun di fat, in cheste stagjon la plui part des bestiis e à il so biel cefâ par puartâse fûr e alore e va in letarc o cuasi, o pûr si svicine al fonts des valadis. Se po o pensìn a cetante nêf che e je vignude jù chest an, o podìn capî che par lôr al è une vore dificil cjatâ mangjative, e par passisi un pôc a mangjin lis plantutis zovinis, fasint un grues dam al ecosisteme. Par scarmî chest malan a vegnin puartadis ca e là grepiis, là che a van lis bestiis a mangjâ, ce che a fasin dut câs dome se l’ambient al è cuiet.
◆ La leç e previôt inalore che il salvadi nol à di jessi disturbât intal so ambient, e cheste leç e vâl par ducj, tant che chê che e permet di jentrâ intai boscs. La leç e previôt ancje che no si puedi lâ intes areis là che si poin lis grepiis, ma chest al ven rispietât pôc e cussì il salvadi al scuen movisi bande areis dal dulintor par cirî mangjative, fasint i dams che o vin dit. No son dams di pôc, crodêtmi, se in Austrie si prossume che ogni an si pierdin cussì 70 milions di Euros.
◆ Par fâ in mût che il bosc al puedi jessi gjoldût di ducj, al sarès indispensabil meti in vore un compuartament cussient e sostignibil viers l’ambient naturâl e, ben clâr, rispietâ lis leçs. Intant che i sports invernâi si pratichin dome par pôcs mês, il bosc al da di vivi aes bestiis par dut l’an, e ai oms ur da lavôr par dute la vite: par taiâ un arbul si sta mieze ore, ma par fâlu cressi si à di spietâ un secul. ❚