I PROTAGONISCJ – Cromazi e l’autoritât dal “Pape di Aquilee”

Sant Cromazi al è vescul di Aquilee dal 388 al 407, dopo di S. Valerian. Al ven consacrât di S. Ambrôs ae vuide di une des glesiis plui impuartantis de cristianitât. Za tal Concili di Aquilee dal 381, ancjemò predi e puartevôs dal vescul Valerian, si veve fat vualmâ pai siei intervents sutîi. A testemoneance de sô predicazion e de sô ativitât di pastôr, nus reste un coment preseât dal vanzeli di Mateu e ancje une schirie di predicjis une vore bielis, discuviertis dome te seconde metât dal secul stât. Lis omeliis di Cromazi, di fat, a son consideradis tra i tescj plui vîfs e plui biei de antichitât cristiane. No tant pe profonditât di filosofie ma soredut pe clarece e semplicitât di spiegazion des veretâts de fede ai siei fedêi. Nol fevele par astrat ma doprant figuris e confronts ae puartade di ducj, a pueste par vê la atenzion di cui che lu scoltave. Une opare mestre!
◆ Cun Cromazi, no par nuie clamât “il Pape di Aquilee”, la citât e je considerade la plui impuartante par nivel culturâl e teologjic. Un centri di elaborazion di ideis cuntun leam fuart cu la Asie Minôr, cul Noricum e cun dut l’Orient. In chel timp gloriôs, a Aquilee si fâs cuintri aes eresiis, si finanziin operazions culturâls penzis, di Aquilee e partìs la evangjelizazion des tieris di soreli a mont e di soreli jevât. Al è propit Cromazi che al stice Rufin di Concuardie e S. Jaroni a scrivi oparis monumentâls e a voltâ dal grêc la sapience antighe par metile a disposizion dal mont ocidentâl. Cul sant vescul Cromazi, Aquilee e vîf pardabon une stagjon biele. La sô ativitât salde di pastôr e di costrutôr (al tire sù la basiliche post teodoriane) si zonte ae vore par incressi la innomine di Aquilee tal mont. Cheste autorevolece de Glesie di Aquilee, stiçade e fate incressi di Cromazi, e restarà a dilunc par secui; e sarà, in fin dai fats, la fonde che e permetarà ai siei vescui di cjapâsi sù, daspò di 150 agns, il titul di patriarcjis. ❚