L’inviât de Rai sul viadot Morandi al conte il dolôr
e il tornâ a nassi di int che no si plee al destin
«Alore, chest puint?!»: me fasin ancjemò cheste domande, ogni volte che o torni a Paluce. Come pûr in tancj sui social o sul telefonut, ae fin a van a finîle simpri li: la grande tragjedie che ai 14 di Avost dal 2018 e je colade su Gjenue. Il Puint Morandi vignût jù: 43 muarts, 600 sfolâts. O jeri li: o ai viodût e o ai contât dut pai tg de Rai, redazion di Gjenue, dulà che o lavori aromai di doi agns. Cumò che un toc di cheste storie e je finide, cun 1067 metris di puint ducj sù, al è rivât il moment di contâus ce che a son stâts chescj doi agns: ce che al à volût dî cjatâsi denant de soference des fameis che a àn pierdût fîs e parincj, de rabie de int slontanade di cjase, denant dai pompîrs che a sgarfavin dentri dal riu Polcevera. Ma ancje di ce che al vûl dî tornâ a scomençâ, tirant sù di corse ce che agns di malegracie a àn butât jù intun secont, in chê vilie de Madone di Avost. Mi someave di jessi dentri di une storie za vivude: il dolôr e il tornâ a nassi, la distruzion e la costruzion, la muart e la vite. La sintesi di dut. Come se al tornàs a vivi chel traume, comun a ducj i furlans e che – jo masse piçul – lu ai vivût “di ripuart”. O contìn storiis, ma il dolôr che ti à segnât la vite al pues deventâ, e spes al devente, il filtri che tu contis chês storiis.
◆ O ‘nt varès centenârs, di ricuarts, dai miei dîs sul puint di Gjenue colât e tirât sù gnûf.
◆ Lis feridis psicologjichis sui fruts dal cuartîr, li sot: Certosa. Mi àn impensât chês patidis dai nestris, intai dîs dal Orcolat. O ai contât dal lôr prin dì di scuele, un mês dopo dal puint colât: a vevin il Morandi “piturât” ogni dì sui barcons. Simpri li, cu lis machinis parsore. E in chê zornade di mieç Setembar, suspiet di normalitât, lis musis a jerin ancjemò dutis viers di lui, che nol jere plui chel di prime, ma sdrumât. Il bocon a soreli jevât come se al cricàs dal cîl. In chê dì, lis mestris ur faserin cjatâ une poesie su lis lavagnis: “Ce maravee un puint! La linie, un arc parsore dal gredei de citât». Propit come in Friûl tal ’76, ai fruts tes scuelis in tende: judâts a capî chês muarts e a cirî un parcè che chel “ziment agns Sessante” al fos plombât jù, cambiant par simpri la lôr esistence e chê des lôr fameis, scorsâts di cjase, di corse e cence mateçs. Un tradiment: lôr nassûts cul puint sore dal cjâf, dutun cun chel tet che nol pues mai fâ dal mâl.
◆ Lis feridis, il dolôr. Fintremai dai pompîrs, che culì a lavorarin. Cuant che o ai savût che e jere une scuadre di Pordenon, o soi lât subit a cirîju. O vevi dibisugne di jentrâ in confidence cun lôr che a rivavin de mê stesse tiere, parcè che in situazions dal gjenar i rapuarts cui socoridôrs a son simpri cetant formâi. Mi impensi ancjemò la muse rosse di soreli e di sudôr dal comandant, Stiefin Zanut, ingropât: «O vin di fâ i conts ancje cu la nestre frustrazion: pes cundizions di cemût che o cjatìn chei biâts e par chê voie di salvâ, ma che no si rive adore». A cirivin ancje Mirko, che no si cjatave. La sô storie mi à butât devant i limits dal gno mistîr, dantmi cualchi sens di colpe, che mi puarti ancjemò daûr. 33 agns, il zovin al lavorave intun magazen propit sot dal Morandi, cuant che il puint al è vignût jù. I gjenitôrs no molarin un minût lis rostis dal Polcevera. No si saveve ben ce muse che a vevin, ma zirant jenfri lis tendis dal prin socors de Crôs Rosse o jeri rivât adore di capî cui che a jerin. «Mi racomandi: cjape sù dut, ma di lontan», i ai dit al gno cameraman. Jo mi soi svicinât cul microfon e ur ai domandât: «Ce us àno dit?». A vaìvin e a jerin sot shock: ancjemò in dì di vuê no soi sigûr che a vessin viodût il microfon. «Achì a passin lis oris e no si sa nuie: ma jo o vuei puartâmal a cjase, il gno frut», mi rispuindè il pari. Po dopo, o ai fate la domande sbaliade: «Cui jerial Mirko?». “Jerial”, al passât. Dome plui tart mi soi rindût cont che al è come se o ves scjafoiât lis lôr sperancis. Tal servizi, che o soi lât a cirî par tornâlu a viodi, o ai comentât cussì chê interviste “di confin”: “Nol è nuie di plui orent pai gjenitôrs, che sorevivi ai lôr fîs”. Lu àn tirât fûr ai 18 di Avost, cuatri dîs dopo che il puint al è vignût jù. Ultin: il cuarp di Mirko, che no si cjatave.
◆ Lis feridis, la frustrazion, il dolôr. La prove dal riscat. Fâ di corse, un monitori. Cussì par il gnûf viadot “Genova San Giorgio” a doprarin il “Model Friûl”, ancje se cumò al è di mode fevelâ di “Modello Genova”. Ma simpri chel al è: un comissari cun podei decisionâl, proceduris semplificadis par l’afidament dai cantîrs, decentrament aministratîf e finanziari. Lu ai contât in lunc e in larc il gnûf puint: cerimoniis e primis pieris. Sei stât il prin cronist a cjaminâi parsore. Varai ancje, dal sigûr, esagjerât di cualchi bande. Resti convint che il vêr riscat al sedi tal no dismenteâ ce che cheste vicende nus à di insegnâ. E al sedi anche tal ricuardâ, simpri, che a ‘nd è stâts 43 muarts. Tal memoriâl dal Puint, un piçul parc scuasi sot dal pilon 9, chel colât, ju impense ancje un toc di Cjargne: il grant plancum taront, dulà che a son plantâts 43 arbui – un par ogni vitime – al è stât metût adun doprant i arbui dai nestris boscs, butâts ju di Vaia, tal atom dal 2018. Indaûr: il dolôr e il tornâ a nassi, la distruzion e la costruzion, la muart e la vite. La sintesi di dut. ❚
LA INTERVISTE - / Toni Capuozzo: «Ognidun al bale cun sô agne»
Oscar Puntel
Nus à lassâts Toni Capuozzo, il grant gjornalist. A son za ce tancj i ricuarts che si viodin ator su di lui, parcé che al jere un om ce tant stimât e amât. Al jere un amì de La Patrie dal Friûl, e al à vût scrit ancje par nô. Sì, par furlan. Parcé che […] lei di plui +
Zovins di gale / Sborf, il zûc par induvinâ e imparâ peraulis par furlan che al à za concuistât miârs di personis
Erika Adami
Daûr un grup zovin che al à a cûr la lenghe furlane Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf […] lei di plui +
Galerie fotografiche / Cuinte edizion di “Stin dongje ae patrie”
Redazion
Pe rassegne Avostanis, Domenie ai 4 di Otubar li dai Colonos si è tignude la cuinte edizion di “Stin dongje ae Patrie“. La storiche riviste furlane e a fât fieste par i siei otante agns e e a cjalât al avignî adun cul mont de culture, de musiche, dal associazionisim, dal sport tal ricuart no […] lei di plui +
Stin dongje ae Patrie / La storiche riviste furlane e fâs fieste par i siei otante agns
Redazion
Pe rassegne Avostanis, Domenie ai 4 di Otubar aes 3 dopomisdì li dai Colonos a Vilecjaze di Listize tierce edizion di Stin dongje ae Patrie. La storiche riviste furlane e fâs fieste par i siei otante agns e e cjale al avignî adun cul mont de culture, de musiche, dal associazionisim, dal sport tal ricuart […] lei di plui +
La piçade / Salts, lavoradôrs e… laris. Almancul i laris a fevelin par furlan
Mastiefumate
Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant […] lei di plui +
Gnovis pai fruts / I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ
Redazion
Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano? ◆ A partî de fin di Jugn al è rivât tes ediculis dal […] lei di plui +



