9. Autonomie come categorie spirituâl

Tantis a son lis iniziativis e fiestis, lis datis simbolichis che pre Checo al à metût impins, sul plan religjôs, culturâl, storic par creâ une cussience furlane, un sens fuart di identitât tal popul. Impuartants e fuarts i siei intervents tal timp dal taramot par une ricostruzion che e fos fate a nestri mût e che po e je deventade “il modello Friuli”.
pre Roman Michelot
Prime di cognossilu, di scoltâlu, di frecuentâlu, ancje jo o preavi, o resonavi, o scrivevi par talian e o varès baratât dut il gno mont culturâl e spirituâl par cualsisei modernitât o banalitât taliane o americane. Come che a àn fat i indians cul aur che lu scambiavin par un toc di spieli, o la nestre int cui cjaldîrs di ram par un seglot di plastiche, o cul lôr patrimoni di sapience svendût par cuatri piuladis plui o mancul siguris par talian. No podìn inrabiâsi cui gjenitôrs e cui nonos che a talianin cui fîs e cui nevôts se nissun no ur à insegnât il valôr straordenari di ce che a butin vie e il dam ireparabil di pierdi la proprie lenghe, culture, muse, anime.
◆ Pre Checo chest nus al à berlât in dutis lis manieris e ancjemò di plui intant dal taramot, che al riscjave di sfigurâ par simpri il cûr dal nestri cûr. Al à batût e berlât par une ricostruzion oneste, fedêl e inteligjente. Al à pretindût rispiet cuant che o domandavin la caritât a la Italie e al mont. “Fasêtnus regâi che nus plasin a nô, e no a voaltris. Che se us plasin a voaltris e no a nô, o podês tignîsai” al à berlât te basiliche di Aquilee. E cul Friûl in zenoglon, al à vût il fiât di dî: “Il fat che no podìn tornâ a ripiâsi di bessôi, nol vûl dî che no podìn aministrâsi di bessôi”.
◆ Lis sôs bataiis politichis, par un partît furlan e dai furlans, che lui sal viodeve usance une Volskspartei nostrane, la mozion dai 529 predis pal svilup dal Friûl, lis manifestazions e lis sfiladis e lis firmis pe universitât, la messe par furlan, la fieste dal popul furlan stranfât pal mont, i apontaments a Aquilee pai 3 di Avrîl e pai sants Ermacore e Fortunât, lis conferencis ator pal Friûl e ancje fûr, a vevin dutis un unic intent: fâ saltâ fûr i furlans di une situazion croniche di scuniment, di rassegnazion e di passivitât par che a cjapassin in man di protagoniscj il lôr destin politic, economic e culturâl. Come ogni popul decent.
◆ Cheste ativitât inteletuâl, culturâl, religjose e politiche, che di altris bandis le clamaressin dal sigûr “teologjie de liberazion”, e veve lis virtûts e i limits di ogni robe peade a chel moment e a chel contest sociâl. Un profete e un mestri al à di fâ lûs intal so timp, e duncje la part plui plene di significât e je une rispueste adate a chel moment. Se no al fevele parsore dai nûi. Cul passâ dal timp, si gjave o e cole di bessole la part acidentâl, episodiche, e al reste chel alc di trassendent, di profont e vitâl che al parten a la storie stesse dai oms. Pre Checo nol pues e nol à di fâ ecezions e duncje al sarès un tradî il so pinsîr e la sô volontât se nô o cjapassin ce che lui al à dit intal so moment par ripetilu a pampagal vie intal nestri timp e contest cambiât e di tant. O vin di vê il sintiment di tramandâsi il spirt di une persone, no il so cuarp, come che a stan fasint in diocesi lant ator cu la cassele dai vues di sant Luîs Scrosop. ❚